Siman pasa nos dushi isla di Aruba a host un di e eventonan di landamento mas grandi den e region di Centro America y Caribe esta e Central American and Caribbean Amateur Swimming Confederation 2018(CCCAN) den e disciplinanan di landamento artistico, landamento y Open Water. Aruba conoci den Caribe como un di e paisnan mas fuerte den landamento y landamento artistico e ultimo ocho añanan a organisa un magno evento deportivo cu a conta cu no menos cu 700 atleta y delegado for di 24 pais den region. Na banda cu e federacion di landamento, Arubaanse Zwembond y e Comision Organisador tabata tin lunas ta trahando duro pa realisa e evento di CCCAN 2018 durante di un periodo di 12 dia, e seleccion di Aruba den e tres disciplinanan di landamento tambe a prepara nan mes fuertemente pa competi contra di miho landadonan di Centro America y Caribe y cu exito.
Na fnal e seleccion completo di landamento di Aruba a keda como e ganadornan maximo di e Central American and Caribbean Amateur Swimming Confederation 2018(CCCAN). Cu e puntuacion di 1301.5, Aruba a triunfa cu un prome lugar overall den e competencia lagando paisnan grandi manera Trinidad and Tobago, Colombia, Panama y Costa Rica su tras. Aruba a logra un total di 26 medaya di Oro den e tres disciplinanan combina sin lubida e cantidad grandi di medayanan di Plata y Brons conkista pa nos lanadonan ta un muestra palpabel di e bon desaroyo cu e deporte aki ta bin ta hibando e ultimo añan como un di e mihonan. Den cada oportunidad den competencianan internacional bishita, e deporte di landamento a representa Aruba dignamente y cu exito, esaki na nivel di seleccion y colegial. Gana un competencia grandi manera e CCCAN 2018 mester fungi como un boost pa nos sigui traha mas duro ainda pa mantene e nivel aki. Den tur tres disciplina nos tin muchanan cu super talento cu pa prome biaha a debuta den un competencia grandi y ya caba a laga nan nomber resona. No tin duda cu dentro di algun aña nan tambe lo ta riba e podium mas halto y scucha e tono glorioso Aruba Dushi Tera.
Stichting Fundacion Lotto pa Deporte ta masha contento di por a yuda contribui grandemente na e campeonato internacional di landamento Centro America y Caribe esta e Central American and Caribbean Amateur Swimming Confederation 2018(CCCAN) na Aruba. Un pabien ta bay pa Arubaanse Zwembond, e Comision Organisador y sigur na nos seleccionnan di landamento, landamento artistico y Open Water cu a logra e prome lugar overall den e CCCAN 2018.