E aña 2016 sigur tabata un tremendo temporada pa e club di taekwondo esta Brazil Taekwondo Stichting caminda nan a logra lo maximo tanto den torneonan local como tambe internacional sin conta tur e actividadnan organisa cu exito pa asina por realisa e metanan poni. E aña aki Brazil Taekwondo Stichting ta celebra su di 22 aña di existencia y algun dia pasa a celebra esaki engrande cu un tremendo happening pa tur miembro mas invitadonan unda e reconoce esunnan cu di un of otro manera ta trahando duron pa hiba e organisacion di taekwondo padilanti y semper cu e apoyo di prensa local kendenan tambe a haya nan merecido reconocimento.
Brazil Taekwondo Stichting a conoce un bon aña pa loke ta camponan di entrenamento unda a invita entrenadornan di taya mundial a bin duna clinica na Aruba. Nos por a mira Henk Meijer ex campeon mundial, ex coach Olimpico di Hulanda, Francia, Grecia y Hall of Famer cu a duna clinica na e muchanan di Brazil taekwondo mescos tambe a conta pa Russell Beneby un entrenador di e seleccion di Merca di taekwondo kende a duna un siman di training na e atletanan di Brazil Taekwondo.
Pa loke ta torneonan local y internacional, e atletanan di Brazil taekwondo no por a keda atras. Pa di 4 biaha consecutivo e club a gana e copa di TK5 na Surinam. E atletanan Záhyon y Jourdé Klaber a participa na e Junior World Championship cu a tuma lugar na Burnaby, Canada mientras cu cinco atleta, Brazil Taekwondo Stichting a competi na e World Taekwondo President’s Cup na Portland, Oregon USA unda dos a logra di clasifica pa Pan Americano 2017. Nan a competi tambe na e TK5 na Corsou y e Costa Rica Open. Mas cu claro no por keda sin menciona e exitoso Best of the Best Taekwondo Cup 2016 cu Brazil Taekowndo Stichting tin hopi aña ta organisando na Aruba y cu exito. Por ultimo e atletanan Rasheed Lowe, Clifford Rasmijn y Brazil Taekwondo Stichting a wordo reconoci pa Uptown Awards.
Lotto, e loteria di Aruba ta felicita Brazil Taekwondo Stichting pa cu nan tremendo aña deportivo 2016.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.