Diasabra mainta na e despedida di e seleccion nacional di taekwondo, director di St. Fundacion Lotto pa Deporte, sr. Di Stefano Wernet a hasi entrega di e uniform di taekwondo na director di Tiger Taekwondo Academy, sr. Teofilo Rodriguez. Un trainingspak porcierto mas bunita cu e logo di tanto Lotto como e emblema di Tiger Taekwondo riba dje.
Na e ocasion aki Di Stefano Wernet a hiba palabra unda e la bisa cu un bez mas Lotto ta cambiando bida di nos deportistanan mirando cu awor ta un otro seleccion di Aruba den e caso aki taekwondo ta haya e oportunidad pa competi den exterior esta na Colombia y ta contento di por a aporta na un set di uniform nobo na Teo Rodriguez y Tiger Taekwondo Academy.
“Algun tempo atras sr. Teofilo Rodriguez di Tiger Taekwondo Academy a aserca St. Fundacion Lottto pa Deporte pa un set di uniform nobo. Mesora Lotto a bay di acuerdo pa duna un man den esaki pa motibo cu un uniform ta algo representativo. E ta algo pa nos hubentud y asina tambe bo ta minimalisa cu organisacionnan ta bende rifa hunto cu nan atletanan den e solo cayente pa yega na fondo pa por cumpra nan nesecidadnan. Lotto un bes mas ta felicta sr. Teo Rodriguez y Tiger Taekwondo Academy cu nan set di uniform nobo. Awo e atletanan por bay den forma representativo cada competencia bishita”, Sr. Wernet a bisa.
Teo Rodriguez di Tiger Taekwondo Academy tabata masha agradeci na St. Fundacion Lotto pa Deporte y sr. Di Stefano Wernet pa e aporte duna na su atletanan.