Cualkier partido politico cu ta aspira pa haya confiansa di pueblo pa goberna nos pais, mester demostra seriedad cu ta bin compaña pa un nivel di responsabilidad caminda nos hendenan lo sinti nan mes bon sirbi.
Parlamentario Jeffrey Kelly di fraccion di AVP ta mustra cu net esaki ta loke partido MEP y su fraccion no ta haciendo den e aña electoral aki, caminda nan ta duna muestra di un pensamento politico anticua, cu solamente ta cuadra den e tempo di piedra.
Declaracion di Evelyne
Cu gran asombro pueblo por a tuma nota cu siman pasa e lider di MEP y su fraccion a publica un foto di archief caminda tur tabata presenta den sala di reunion di Parlamento (no e aña aki), unda cu nan a anuncia cu MEP lo traha un inventario di scolnan cu mester wordo drecha aki na Aruba.
Dialuna ultimo den e rueda di prensa di fraccion di MEP, Evelyne Wever Croes ta declara cu ya caba nan tin e solucion pa drecha tur scol na Aruba y soluciona e problema aki den enseñansa di nos pais. Increibel con e lider di MEP, kende mester ta bon na altura cu durante ocho aña di gobernacion di MEP, realmente nada a wordo haci na scolnan y tur loke pueblo por corda ta cu na algun scol plafond a bin abou riba maestro y cu alumnonan mester a para dilanti di un porta di toilet, pa nan coleganan por uza esaki, ya cu e toiletnan no tabatin porta.
Maneho bou gobernacion di AVP
Desde cu partido AVP a haya confiansa di pueblo, den e periodo di 2009 pa 2013 bou maneho di Minister Arthur Dowers, un total di ocho scol a wordo reconstrui y renoba pa e suma total di casi 23 miyon florin. Den mesun periodo aki bou di Minister Dowers, un total di 11 scol a haya cura pa asina e muchanan ta mas proteha pa un suma di 2.1 miyon florin mientras cu 18 scol a haya reparacion y un man di verf nobo pa e suma total di 1 miyon florin.
Tur esey despues cu pa ocho aña gobierno di MEP a neglisha tur e scolnan aki. Na 2013 ora cu pueblo a duna mandato ainda mas cla na partido AVP cu 13 asiento, bou di Minister Michelle Hooyboer-Winklaar, un total di 14 scol a wordo sea renoba, reconstrui y a ricibi cura y otro trabounan di renobacion pa e suma te awor di casi 26 miyon florin.
Riba mesun periodo aki un total di 13 scol a forma parti di e proyectonan escolar for di e fondo pa enseñansa pa e suma di 3.8 miyon florin.
Esakinan ta cifranan oficial cu tur miembro di Parlamento mester tin den nan poder, cu ta na nan disposicion, pues e lider di MEP y su fraccion no mester a bay haci ningun inventario, ya cu e maneho di Gobierno di AVP ta na bista di tur hende cu kier mira y cu no ta cana cu wowo tapa pa progreso.
Lista di urgencia di scolnan pa renoba
Durante tratamento di presupuesto 2017 prome cu fin di aña, Gobierno a informa Parlamento riba preguntanan haci, riba e lista di proyectonan di scol cu tin prioridad (urgentielijst) pero aki tampoco fraccion di MEP no a mustra interes pa haci nan trabou manera mester ta.
Si e fraccion ta serio y ta presenta na trabou y traha manera pueblo ta spera di nan, e inventario cu a mustra riba e ‘quickscan’ mas rapido den historia riba enseñansa, no tabata necesario. E solo hecho cu e lider di MEP ta kere cu pueblo no ta mira cuanto a wordo haci na scolnan rond di Aruba, ta mustra cu MEP un biaha mas kier cana kibra, pa saca probecho politico partidista y personal, ya cu ningun momento ta mustra di tin enseñansa na pecho, Parlamentario Jeffrey Kelly ta mustra.