E aña nobo lo trece oportunidad y reto nobo pa Camara di Comercio y Industria (KvK). Den 2013 KvK lo sigui amplia su servicio na e cliente por medio di algun proyecto nobo cu lo ser introduci. Esaki ta por ehemplo e digitalizacion di nos servicio y archivonan, cu ta importante tanto pa aumenta eficiencia na trabao como pa brinda un mihor servicio na publico en general como na entidadnan cu ta haci uso regularmente o hasta diariamente di registro publico cu KvK ta maneha. Servicio digital Pa por realiza e adelanto grandi aki, KvK ta haciendo lo necesario den upgrading di su sistema di automatisacion, incluyendo cambio riba servicionan disponible via website. Banda di e comodidad pa trabao interno di tin tur file digitaliza, esaki ta significa tambe un adelanto grandi den servicio na publico. Na 2013 segun cu e archivo keda digitaliza, e filenan lo ta bira disponible tambe pa “inzage” online. Esaki lo facilita enormemente trabao di specialmente e usuarionan grandi manera banco, compania di seguro, oficina di notario y abogado cu por revisa file publico di cualkier compania for di nan oficina. Lo facilita tambe e compra online di documento di cualquier file. Esaki lo elimina e necesidad pa bin personalmente na KvK pa revisa documento, loque ta un ventaha tanto pa e cliente como pa KvK. Alavez e servicio digitaliza aki por ta un tremendo servicio pa tur entidad publico cu lo por haci uso tambe di e servicio online aki pa revisa documento publico di empresa for di nan oficina.
Deposito di jaarrekening
E aña nobo lo trece un responsabilidad mas pa KvK. 1 di februari 2012 a drenta na vigor cambionan haci den Codigo di Comercio (Wetboek van Koophandel) y den e Ordenanza riba Registro Comercial (handelsregisterverordening). E cambionan principal ta cu entrante 2013 ta drenta na vigor e obligacion di deposita cuenta anual (jaarrekening) y di registro di accionista pa tur NV y AVV, mientras cu e obligacion aki ta existi desde aña 2009 pa VBA. Tambe a bin e obligacion pa NV, AVV y VBA deposita tur aña un copia actualiza di nan registro di accionista. Tur compania mester deposita ambos documento dentro di ocho luna despues cu nan aña economico (boekjaar) termina. E ley ta encera cu cada compania mester percura pa e cuenta anual ta redacta y aproba, dentro di ocho luna despues cu nan aña economico termina (a menos cu tin un prolongacion di e periodo aki). E cuenta anual aki mester consisti por lo menos di un balanza, cuenta di ganancia y perdida y un memoria explicativo di e documentonan menciona. E cuenta anual pa un empresa por ser elabora pa e empresa mes, pero tambe por scoge pa laga un accountant of administratiekantoor haci esaki. Dentro di ocho dia despues di aprobacion di e cuenta anual, esaki mester ser deposita na Camara di Comercio. E empresa mes por indica si e cuenta anual deposita ta confidencial of ta accesible pa publico. Den e promer caso KvK lo percura pa e 2 documento bay den un file separa confidencial cu lo ser seya, y den caso cu e empresa no tin obhecion pa publico por mire, e ta keda añadi na e file publico di e compania. Cancelacion di negoshi prome cu 1 januari 2013 KvK ta conseha un vez mas tur empresario cu no ta opera mas, pa nan cancela e negoshi promer cu dia 1 di januari 2013. Cancelando negoshi e aña aki ainda ta evita e pago innecesario di e contribucion anual (jaarlijkse bijdrage) pa aña 2013. Esaki ta conta tambe pa esnan cu tin un eenmanszaak di cual e negoshi a pasa pa un NV of VBA mientras tanto, pero cu nan no a cancela e eenmanszaak ainda. Esaki ta conta tambe pa filial di un NV of VBA cu a stop di opera. Por pasa tur dia di trabao cu ta resta ainda di e aña aki pa cancela negoshi of pa haci otro cambio necesario den datos di e negoshi, manera cambio di director, adres, telefoon of email. Adaptacion ta ser haci gratis di dialuna pa diabierna, entre 1:00 pa 3:00 di atardi. Orario adapta durante dianan di fiesta Camara di Comercio ta informa cu nos oficina ta habri di dialuna pa diabierna, di 8:00 pa 16:30. Riba dialuna 24 y 31 di december, KvK ta habri di 8:00 te cu 12:00 pm. Pa mas informacion, fabor di tuma contacto cu e Departamento di Registro na tel. 582-1566 ext. 21/22/32 of via email registers@arubachamber.com. Por contact Business Information & Support, yama 582.1566, ext. 35/27/30 of email businessinfo@arubachamber.com.
Camara di Comercio ta desea tur hende feliz dianan di fiesta y un prospero aña 2013.