Cu bista riba futuro y e posibel retonan cu Aruba lo por tin na caminda, lo ta bon pa crea un grupo di experto pa vigila y hasta prepara Aruba pa un posibel crisis cu lo por surgi den futuro. Segun parlamentario di partido MEP, Chris Romero, di e manera aki lo por ta prepara pa cualkier eventualidad, minimalisando di e manera aki e efectonan di un posible crisis mundial.
E parlamentario a sigui splica cu si nos observa e situacion social y financiero caotico cu Venezuela ta pasando aden actualmente y pa algun aña caba, nos por bisa cu sigur nos ta sintiendo e efectonan di nan crisis aki na Aruba tambe.
E efectonan cu ta mas pisa pa Aruba sigur ta e ola di imigrante Venezolano cu a bin busca un mihor calidad di bida na nos pida baranca, of e caida di e turismo procedente di e pais aki.
Sin duda e retonan comercial cu nos a haya nos mes aden door di e crisis economico na Venezuela, tambe a afecta nos isla significativamente y toch na un manera inespera. Mi ta sigur cu esakinan ta aspectonan cu lo por a evita si nos na Aruba tabata miho prepara pa tipo di eventualidadnan asina.
E fuente principal pa Aruba su economia ta keda Merca. No solamente nos turismo ta bin mayormente for di Merca, pero tambe e gran mayoria di nos importacionnan ta bin di aya tambe.
Expertonan mundial ta batiendo alarma caba cerca President nobo di Merca pa cu e caida economico cu e pais aki lo sufri si no tuma medidanan inmediato. Si Merca mester sufri un recesion economico atrobe, of algo mas pisa cu esey, Aruba lo sinti e impacto tambe. Imagina si bin un crisis y prijs nan di importacion for di Merca subi cu 45% kico esaki lo haci cu nos economia?
Y si tin un crisis financiero con hopi esaki lo afecta nos pilar ecomomico principal, cu ta turismo?
Nos no por warda pa algo pasa pa asina nos tuma accion. Mester cuminsa idea proyecto y plannan na corto y largo plazo den caso di cualkier eventualidad.