Ta haciendo e preparacionnan pa haci Parlamento un organo independiente . Sr. Juan “Ady” Thijsen, presidente di Parlamento ta elabora ariba esaki.
Ta hopi importante, pa Parlamento como instituto por sinta cu Raad van Advies, Centrale Accountantsdienst, ALgemene Rekenkamer. A pidi e reunion aki, ya cu parlamentarionan, den e setting nobo, ta importante pa nan sa con e departamentonan aki ta funciona, kico ta nan responsabilidad y kico ta nan parti den maneho di gobierno. Vooral tambe, Directie Financiën den e parti di presupuesto. Ta wak e ciclo, unda e presupuesto ta wordo traha, e ta bay Raad van Advies, e ta bin Staten, pero ta haya tambe cu despues tin Algemene Rekenkamber pa loke ta ta Jaarrekening. Pero tin un Centrale Accountantsdienst cu ta un departamento hopi importante, cu ta esun cu mester traha ariba e checks and balances, control. Asina parlamentarionan ta cera conoci cu e departamentonan aki.
Tin hopi parlamentario cu a drenta parlamento awo pa prome biaha. Esaki ta un bon momento cu nan a haya e presentacion. Tabata tin hopi pregunta, unda cu nan a duna contestanan cu Sr. Thijsen a sinti cu asina nan por duna e comunidad, e confiansa cu nan ta bay controla e gobierno manera cu mester ta. Di parti di parlamento, pero tambe di e institutonan aki, cu ta haci nan trabao manera mester ta tambe. Asina mustra e pueblo cu tin un cambio, cu ta un cambio di berdad y no di palabra so.
Tin dos departamento, Directie Financien y Centrale Accountantsdienst. Pero loke ta Raad van Advies y Algemene Rekenkamer, ta Hoge College van Staten. Mescos cu Parlamento ta ariba caminda pa independisa, pa ta mas ariba nan mes y ainda esey no a tuma luga ya cu ainda ta cay bou Minister van Algemene Zaken. Parlamento mester traha los di gobierno pa ta mas obhetivo.
Centrale Accountantsdienst y Directie Financien ta mustrabo con e camindanan ta cana y como parlamentario semper e por acudi cerca nan. Un parlamentario tambe mester haci nan investigacion propio. Si e parlamentario no ta compronde algo, e departamentonan aki por duna toelichting ariba dje. Nan por duna parlamento mas sosten posibel, pa sigui e caminda, e begroting cu nan a traha, e dicon y e pakico. Esaki segun Sr. Thijsen ta un bon manera pa traha.
Parlamento tin un meta su dilanti. Nan kier pa independisacion tuma luga mas lihe posibel. Ainda nan no sa cuanto e ta bay dura, pero segun Sr. Thijsen ta cu e meta ta, cu den e 4 añanan cu ta bay bin, lo independisa e instituto den cuadro di e cuater añanan. Mas lihe, mas miho. Pero esey no kiermen ta bay haci algo den pura, pa ora e keda cla, e keda profesionalmente haci.