Clarisca Velazquez cu ta miembro di partido AVP, durante e conferencia semanal a comenta riba e ley di trafico. Dentro di poco lo atende cu algun ley den trafico. AVP tambe lo trece algun amienda pa asina evita cu hende por burla di husticia ora comete algo robez den trafico. Mester trece un amienda caminda ora un hende ta maneha un vehiculo y comete un accidente no por bandona e sitio sin laga identificacion. No por bandona e sitio mes segun Clarisca Velasquez manera a sosode cu e colega parlamentario cu a duna mal ehempel.
Segun Sra. Velasquez, su colega a burla di husiticia y e articulo 4 di Ley di Trafico lo haci un cambio den dje, pa propone pa Parlamento. Den e artikel 4, inciso 2 caminda cu ora un persona ta core un vehiculo despues di un incidente, cu si e hay’e den un accidente, cu e no por bandona e sitio di accidente. Si esaki sosode, e lo ta cometiendo un crimen den Ley di Trafico. Pero e persona aki, un otor persona a bin busk’e, y den e caso el a burla di husticia y aki e la wak cu e por scapa di dje. E cambionan lo encera cu no por bandona e sitio di accidente.
E persona cu ta bisa cu e ta e homber di husticia, ta e homber cu a burla di husticia. E cambio di artikel 4 di Ley di Trafico, lo haci esaki Besaril- proof. Despues cu e cabayero aki a bandona e sitio, el a duna un mal ehempel, cu despues di dje, el a manera bira un trend, unda cu hopi hende ta bandona e sitio di accidente y no ta para pa nan consecuencianan.
Partido AVP kier garantiza e trafico cu ora sosode un accidente, Polis por haci su trabou ora di rastrea y haci investigacion den trafico. Ta pesey ta haci cambio den articulo 4 den Ley di trafico “Bess- proof”. Pronto lo haci esaki, segun Sra. Velasquez.
Tambe Sra. Clarisca Velazquez a splica cu mester pone un articulo unda mester evita hende di stuur auto cu telefon den man. Por a nota cu esaki por trece trafico na peliger y e por, door cu e persona ta uzando un man, e por strob’e di haci maniobranan cu mester den trafico y kita su atencion. Esaki ta trece trafico na peliger. Tin un articulo caba den ley di trafico, artikel 2, riba e comportacion den trafico, pero e artikel aki ta un “kapstok artikel”, pasobra cu tur cos por pone bou di dje, ya cu e ta un articulo en general. . AVP kier bin cu un articulo specifico riba e uso di telefon den man. Pa otro siman lo bay atende e ley aki den Parlamento y esaki ta e proposicionnan cu fraccion di AVP lo bin den amienda cun’e. Gobierno ta haciendo bastante cu siguridad den trafico, unda cu a bin cu verkeersplateau, pa kibra e velocidad. E causante mas grandi di accidentenan na Aruba, ta stuur auto bou influencia di alcohol, hunto cu e telefon celular ora di stuur.
E fraccion di AVP ta encurasha gobierno pa sigui cu e trabounan cu ta wordo haci pa garantiza un trafico sigur. Ta pidi e automobilistanan pa tene poco pasenshi, ya cu tin hopi cambionan cu ta tumando luga na diferente luga riba nos isla.
Segun Sra. Clarisca Velazquez a splica, cu e plateau ta hopi pidi door di ciudadanonan y hopi biaha ta e habitantenan preocupa ta pidi pa e verkeersplateaunan aki, ya cu e verkeersplateau lo kibra e velocidad. . Hopi biaha automobilista ta inclina pa core duro. Fraccion di AVP ta spera cu pa otro siman por trata e reunion aki, caminda cu nan ta skucha e pueblo su preocupacion, unda cu lo por aproba e leynan aki y pa tin un miho siguridad den trafico.