MIAMI, Florida – E tempoeraturanan cada biaha mas cayente den e superficie di lama y un inexistente of debil fenomeno di El Niño, lo contribui e aña aki na un temporada di horcan mas fuerte di lo normal den Atlantico, segun e Administracion Nacional Oceanico y Atmosferico di Merca (NOAA), a bisa diahuebs.
Di acuerdo cu NOAA, ta spera entre 11 y 17 tormenta cu nomber, di 5 pa 9 horcan y di 2 pa 4 horcan mayor of di gran categoria.
E prediccionnan a aparece den e pronostico oficial cu NOAA a haci pa e temporada di horcan cu ta cuminsa dia 1 di Juni proximo.
“E panorama aki ta refleha nos pronostico di un fenomeno di El Niño hopi debil of inexistente, temperaturanan di superficie di lama cercano of mayor na e promedio rond di Atlantico y un fluho di biento vertical (of biento cortante) mas debil di lo normal,” Gerry Bel, meteorologo principal di e temporada di horcan di NOAA, a bisa.
E prediccion di actividad di tormenta “riba di loke ta normal of cerca di lo normal” probablemente ta pone e residentenan di ciudadnan costero nervioco. E aña aki ta cumpli e di 25 aniversario di horcan Andres, un di esunnan mas devastador di historia, cu a yega durante un temporada abao di promedio.
Esey tin cu haci hende reflexiona y recorda cu mester tin un plan y ta prepara. “E temporada aki a cuminsa rapidamente,” Ben Friedman, administrador interino di NOAA a bisa. E tormenta tropical Arlene a forma brevemente na April den Atlantico. Den un evento poco comun, Arlene tabata solamente e di dos tormenta bautisa di e luna di April.
Pronosticonan distinto
Expertonan di e Universidad Estatal di Colorado ta predici un “actividad liheramente abao di lo normal” pa e temporada aki di horcan, cu 11 tormenta cu nomber, 4 horcan y 2 horcan di mayor categoria.
E pronostico aki a wordo haci na comienso di April, ora cu a pensa cu den e pico di e temporada di horcan a desaroya un fenomeno di El Niño entre debil y modera. E Universidad Estatal di Colorado lo actualisa su pronostico pa e temporada na Juni.
El Niño ta un fenomeno natural caracterisa pasobra e awa ta keinta mas di lo normal den e oriente di e region di Pacifico ecuatorial. Aunke e ta sosode den Oceano Pacifico, tin un amplio impacto den e clima global. Un di su consecuencianan ta un aumento di biento cortante atrabaes di Atlantico tropical, loke ta crea condicionnan hostil pa e desaroyo tropical.
Citando e efecto di El Niño, expertonan di e Universidad Estatal di Colorado ta bisa cu tin un 42% di posibilidad cu un horcan mayor dal riba Merca e temporada aki. E riesgo promedio ta di 52%.
Increiblemente, Merca no a experimenta un horcan di gran categoria desde horcan Wilma, na 2005.
“Aproximadamente, 25% di horcannan mayor cu ta forma den Atlantico ta dal riba Merca,” Phil Klotzbach, investigador cientifico di horcan di e Universidad estatal di Colorado, a bisa.
“Nos tabata tin 31 horcan mayor desde Wilma, na 2005. E posibilidadnan pa tin 31 horcan mayor forma den Atlantico sin e toca tera na Merca, ta 1 entre 7500,” el a agrega.
Aunke e racha aki casi ta caba aña pasa, cu horcan Matthew.
Horcan Matthew a mata cientos di persona na Haiti y a laga perdidanan di por lo menos un 10 mil miyon di dollar.
Despues di hopi temporada trankil, na 2016 tabata riba lo normal, manera cu a spera, cu 15 tormenta cu nomber, 7 horcan y 4 horcan mayor.
E horcan di mayor impacto tabata Matthew, cu su epicentro pasando mar aden den oost di Florida y Georgia, siendo un horcan mayor, prome cu a toca tera na South Carolina como tormenta di categoria 1 y di a produci inundacionnan historico na North Carolina.
Tambe e paso di horcan Hermine, cu tabata e prome den toca tera na Florida den 11 aña, e estado cu e racha mas largo sin horcan.
“Tin hopi actividad potencial di tormenta den Atlantico e aña aki. Nos no por stop horan, pero si un biaha mas, nos por prepara nos mes,” Friedman ta recalca.
Fuente: www.cnnenespanol.com