Cuerpo Policial cu participacion di e unidadnan motorisa, Flex-Team, Polis Maritimo, personal administrativo y e ekipo di T.B.P (Team Bijzondere Projecten), como tambe Cuerpo Especial Arubano (CEA) y D.T.P. (Departamento di Transporte Publico), a organisa hunto cu Ministerio Publico un accion di Preventief Fouilleren for di 6or di atardi di dia 5 di November pa 6or di mainta dia 6 di November.
E prome parti di e anochi, for di 7’or pa 8’or y mey tabata dedica na controlnan di trafico den e area di “Do It Center” na Shaba. Aki a controla mas of menos 75 vehiculo. D.T.P. a controla 7 vehiculo. A skirbi un total di 13 procesverbaal y a detene 1 persona relaciona na e ley di L.T.U. pa falta di documentonan cu ta demostra cu su estadia na Aruba ta legal.
E di dos parti di e controlnan a tuma luga for di 10or pa 12’or di anochi den diferente zona. Zona 1 tabata e area di bar y restaurantnan, incluyendo Yen Yen, Lekker, como tambe e casnan di pueblo na Noord, e area di Palm Beach, Bakval y Salinja Cerca. A listra 32 persona, a controla 10 vehiculo. Den e proceso a haya 4 persona sin prueba di estadia legal na Aruba y a tuma den beslag atributonan manera sigaria di marihuana, 5 sker, un masker (style di “Scream”), un obheto na mula marihuana y for di algun menor di edad a kita varios botter di bebida alcoholico.
For di cuarto pa 1 di marduga pa 6’or di mainta a sigui cu controlnan den Zona 2, incluyendo e bar y restaurantnan, incluyendo nan parkeerplaatsnan, den e area di hotel. Durante di e accion aki a listra 91 persona, y a traha 20 procesverbaal. A controla tambe 35 vehiculo, dia cual uno a wordo tuma den beslag. Polis a detene tambe 4 persona pa posesion di marihuana, a detene un persona cu tabata mustra burachi y a tuma sker, un cos pa pisa, sombechi den beslag. A kita tambe algun botter di bebida alcoholico for di hobennan menor di edad cu tabata riba parkeerplaats na algun negoshi di horeca.
Banda di 4’or di marduga, polis a topa cu tres mucha muhe menor di edad (13, 14, y 15 aña) den vecindario di De Molen. Polisnan di Flex-Team a nota cu nan tabata comportando na un forma no responsabel y a dicidi di hiba nan Warda di Shaba y yama nan mayornan pa bin busca nan pa asina preveni cu algo indeseabel pasa cu nan.