Riba rednan social por a tuma nota di e lista di e nomber di e parlamentarionan ta riba orden alfabetico y segun secuencia di lista politico. Esaki a trece masha hopi reaccion di parti di e pueblo. Sra. Sharine Luydens, directora di Censo ta splica mas di e procedura aki.
E lista en cuestion, semper ta wordo traha despues cu e resultado di eleccion ta conoci. Antes tabata asina cu e lista aki ta wordo publica den Landscourant, pero ta masha poco hende tabata les’e. Pero cu e era di digitalisacion, tur cos ta bay ariba website di Censo y esaki ta haci e proceso hopi mas transparente. E informacion tambe ta available pa e pueblo.
Sra. Luydens a sigui splica cu despues di eleccion tin tres documento cu ta wordo publica. E procesverbaal di e vaststelling di e eleccion. E besluit di e resultado di eleccion, incluyendo e bereking di e kiesdeler, lijstkiesdeler y kendenan a wordo scogi y e secuencia. Despues di esaki ta publica e 21 personanan cu segun e resultado a wordo scogi pa bira miembro di Parlamento.
E lista publica ariba rednan social ta e lista ariba ordo alfabetico di e 21 miembronan di Staten cu, segun e resultado di eleccion, a wordo scogi como Parlamentario. E 21 personanan aki lo haya un carta. E carta aki ta wordo yama “Geloofsbrieven”. Cada persona lo mester manda contesta si nan ta acepta e posicion aki, si of no, segun Sra. Sharine Luydens, directora di Censo a splica.