Partido MEP a introduci un adicion nobo na su lista pa e proximo eleccion cu lo tuma luga na September. Ta trata aki di dokter Arthur Vallejo y ta enfoca primordialmente riba salud, mirando e preocupacion cu tin riba esaki.
Dr. Vallejo a splica cu den e proximo 6 lunanan ta hopi emocionante y importante pa Aruba. Manera ya indica, su focus lo ta den area di salud. E ta mira cu salud mester di hopi mehoria, mester di profesionalnan hoben envolvi, mester di plannan diferente, forma creativo pa aborda diferente dificultadnan cu ta presenta cu nan tur dia na Aruba, cu e ta sigur cu tur ta sinti nan.
Tin algun punt clave cu lo kier enfoca riba dje. Por ehempel nos ta hopi basa riba un sistema curativo, enbes di un sistema preventivo. Den un sistema preventivo lo por logra scapa hopi placa cu ta bay wordo uza pa hendenan cu por ta ta sufri di un enfermedad cronico, door cu no a pasa den un prescreening den un parti preventivo of un sistema preventivo. Nos dokternan gradua den e region, ta hunga un papel importante den vision di MEP. Aruba mester di nan. Nos mester di nan, segun dr. Vallejo. Kier envolvi nan den e parti di e vision di MEP. Nan ta un papel clave. Ta un oportunidad cu mediconan profesional hoben, studia den e region, por tuma nan famianan tambe, pa wak finalmente e problema grandi cu a haya 11 mil firma pa wordo resolvi. Un aspecto tambe hopi importante ta e parti di inspeccion di medicamento. Ta hayando hopi problema cu medicamentonan actualmente. E medicamentonan generico, no ta bisa cu nan no ta malo, pero mester tin sikiera laboratorionan kimico cu por duna nos e posibilidad pa evalua, cosnan basico cu tur pais merece.
Tin otro aspecto importante cu ta parti di e campaña ta cu dokter Vallejo ta bin di un tata Latino y un mama Arubiano. Debi na esaki e ta kere cu hopi por wordo haci den integracion na Aruba. E ta orguyosamente mita Latino y e ta mita Arubiano. Esaki ta fiel cu integracion den comunidad, si ta posibel y mester traha hunto. Mester traha uni. Vallejo ta pidi pa e Latinonan pa vota uni. Esaki ta nan oportunidad. Esaki ta un momento historico den MEP cu por tin un representacion Latino directo cu por expresa y por ofrece nan voz y voto.
Vallejo a crece den e bario di Tanki Flip. Eynan ta unda su amigonan, bisiñanan ta. Su practica ta situa den Boegoeroei. Su enfoke ta bay ta den e area di Noord, pero en general, e voto Latino, caminda cu nan ta full rond di Aruba.
E ta enfoca riba profesionalnan hoben y e voto Latino. E profesionalnan hoben ta wordo inspira pa bay den politica. Mester di nan tambe. Mester di hendenan hoben cu ta dispuesto pa tuma e riesgo pa sirbi nos comunidad. Esey ta e profesion di Vallejo. E tey pa sirbi comunidad. Mester puntra nos mes tur dia ken a yuda, ken por yuda. Nos tur tin donnan cu Dios a duna nos. Vallejo a menciona cu e tin donnan special cu por ta otro nan no tin y vice versa. Definitivamente, esaki por ta un caminda pa yuda hopi hende na Aruba, mehorando e sistema di salud, cu creatividad, pro actividad pa yega na un solucion na e parti di salud, el a menciona.