linear park

Cu satisfaccion Minister di Turismo, Transporte y Labor, Otmar Oduber, a anuncia cu despues di casi 2 aña ta cla pa finaliza e proyecto di Linear Park den e proximo dos pa tres simannan nos dilanti. Pa por a logra haya Linear Park na un standard cu lo contribui na eleva Producto Aruba mas ainda mester a haci un par di cambio y adaptacion pa mehora e proyecto aki.  Despues di un retraso di 13 luna, ta cla pa dia 17 di maart venidero inaugura Linear Park den e cuadro di e fin di siman di celebracionnan relaciona cu nos Dia Nacional. Cumindanso ya caba for di oranan di mainta lo combina e dia aki cu e Mercado di Santa Rosa riba Plaza Turismo.
Minister Otmar Oduber a agrega cu IBISA, Ministerio di Deporte lo bay organisa un cantidad di actividadnan deportivo riba e plaza y tambe lo tin competencia di botonan di miniatura riba henter e parke aki.
Ta bon pa para y reflecciona riba e proyecto aki cu haya hopi atencion di comunidad, hopi atencion di politiconan. Por a nota varios mesanan poni durante simannan unda fraccion di MEP a tene encuentronan dirigiendo e pregunta ‘si tin costonan adicional pa cu e proyecto aki como tambe ta ki tempo eski lo keda cla.’
Minister Oduber a sa di tene pasenshi y wanta tur e criticanan aki, pasobra na final loke tabata su prioridad ta pa wak e proyecto aki yega na su fase final.  E proyecto total di Linear Park lo tabata un proyecto di 9,1 miyon Florin y a wordo gana pa medio di destaho publico pa compania Prosuinca  pa un suma di  4.8 miyon Florin.  E mandatario ta confirma na e momento aki na henter pueblo di Aruba como tambe na fraccion di MEP, cu e proyecto di Linear Park a logra keda den e presupuesto aki sin a costa pueblo di Aruba un Florin extra. Pueblo di Aruba a scapa 4miyon Florin di loke inicialmente a wordo calcula cu lo e a costa e pais aki.
Den e 3 simannan cu falta tin par di trabou cu mester wordo haci ainda, unda cu por a mira dilanti  Nephtali Park ta trahando un brug pa por laga awa pasa y asina conecta esaki cu e looppad. Na Surfide Marina por mira cu e trabounan ta finalisa cu tabata hasta un disputa den corte cu a dura 3 luna unda cu e interes di Sr. Eman propietario di Surfside Marina su interes y esun di Pais Aruba a wordo sirbi. Pa loke ta e parti di board walk, esaki lo wordo finalisa tambe den transcurso di e simanan aki. Te hasta na final dilanti cas di Gobernador por mira cu a cuminsa ya finaliza e trabounan tambe. Pa otro siman lo por nota cu tur e luznan du caya lo wordo cendi y tur palo di luznan bieu lo wordo kita y asina aki tambe termina e joya di proyecto aki.