Lotto ta felicita Liga Central Braulio Wester cu e titulo maximo conkista den campeonato Latino Americano di baseball Junior League
Aruba sin duda a demostra cu union ta hasi forza durante di e campeonato baseball Latino Americano Junior League teni recientemente riba nos isla. Durante un siman largo nos dushi isla tabata anfitrion di un otro evento deportivo internacional cu a trece varion bishitante di exterior na nos isla. E Latino Americano di baseball division Junior League a conta cu n participacion di 6 pais di exterior y dos seleccion di Aruba mes. Mester bisa cu e fanaticada y amantenan a presencia algun tremendo weganan di baseball presenta pa e hoben peloteronan cu diasabra ultimo a culmina cu e gran final entre Aruba 1 y e pais di Panama. Den un stadion di Nadi Croes/Crismo Angela colma di hende tanto paden como pafor, Aruba 1 representa pa Liga Central Braulio Wester ta logra e titulo di campeon despues di e vence Panama 15 – 4 den un wega maratonico cu a dura un tiki mas cu cinco ora. Despues di 6 aña e baseball di Aruba ta regresa e Serie Mundial di Baseball Junior League cu lo tuma lugar na Taylor, Michigan, Merca. Tabata na 2012 cu casualmente e mesun division di Junior League a representa Aruba den un Serie Mundial di Baseball. Esaki sigur ta un bunita momento pa brand e nomber di Aruba den un Serie Mundial di baseball hubenil cu varios otro pais presente.
Un aspecto sigur cu a resalta durante di e baseball Latino Americano di baseball ta e union entre nos hendenan. Deporte ta uni nos tur cu den un of otro manera ta traha pa logra e mesun metanan poni, e titulo campeonil logra pa nos muchanan ta un muestra palpabel cu nos por. Lotto ta contento di por a contribui grandemente na e realisacion di campeonato Latino Americano di baseball na Aruba. Lotto kier a felicita Liga Central Braulio Wester cu nan titulo campeonil Latino Americano cmo tambe na Aruba Little League y e Comision Organisador pa laga e comunidad di Aruba disfruta di un tremendo espectaculo di baseball internacional riba nos isla. Lotto lo sigui traha duro na bienestar di nos atletanan y e deporte local, paso nos tin curason pa deporte.