Tin ley cu ta proteha e trahado pero di otro banda mester bin mas control riba e doño di casinonan y abogado mr. Hose Figaroa ta splica mas ariba esaki.
Hopi hende ta bay ariba e ley cu a wordo introduci na 2013 y pakico e ley no ta funciona manera mester ta. E culpa, segun mr. Figaroa no mester wordo busca ariba e ley. E ley ta proteha e trahado, ya cu e ta basa ariba richtlijnen di Corte Europeo pa cu traspaso di compania. Si papia specificamente ariba mundo di Casino, e problema ta sinta mas bien na e monitoring cu mester tin riba companianan cu ta bin Aruba pa opera casino. Pa no haya companianan cu ta bin djis pa purba algo of kisas pa gana mas hopi placa den menos tempo posibel pa despues bay.
Ta e tipo di cosnan ey, dus e vigilancia mester ta ariba esunnan cu ta wordo treci pa fungi como operado di casino y no ariba e ley.
Si a dificulta cu;n operado di un dia pa otro , por lanta su bela bay for di Aruba sin laga niun garantia atras cu e trahadonan por ricibi nan pago, e ora no tabata tin e problema. E problema a sinta ora cu e operado a disparce y laga debe tur caminda. Kisas si pone un maneho unda cu ta bay controla mas fuertemente y ta pidi cierto garantianan cu ta bin opera casinonan na Aruba, e ora ta evita cu hendenan ta bin pa echa baina akinan. En todo caso ta atrae entidadnan mas serio, cu di berdad nan tin e business cu nan kier haci na pecho, y e trahadonan na pecho.
FTA a yega di bisa, cu lo ta bon pa cada negoshi cu kier bin establece aki na Aruba, pone un deposito di un cierto cantidad di placa na Centrale Bank pa si acaso algo bay malo, por haci uzo di e placa ey. Si resta lo mand’e pa e doño bek, y esey ta un opcion. Si keda na ehempel di Aura Casino, si tabata tin fondo, e trahado lo por a pone beslag ariba parti di e fondonan pa salarionan atrasa ya cu den casonan aki nunca a zorg pa pidi permiso pa retira niun hende pero a coy nan caminda bay. Trahadonan te dia di awe e trahadonan tin un claim pa salario atrasa. Por a cuminsa un caso den Corte pa paga salario, pero no tin niun caminda pa haya e placa aki.
Abogado mr. Figaroa a sigui bisa, cu Casinonan specificamente, mester ahusta e maneho na momento cu ta permiti operadonan bin opera e casino y kisas por moniterea con leu esey por sosode den otro, pero no solamente den casino pero den otro negoshinan tambe. Tin algo asina ey, den fondo di Cessantia, y si e compania bay failliet, SvB tin placa pa paga e trahadonan nan cesantia. Kisas mester ahusta e pago di Cesantia na algo mas realistico, y nunca e manera di yega na cesantia no a cambia na e realidad di awendia. Kisas ta momento pa traha un formula nobo pa traha un cesantia nobo pa cumpli cu e trahado. Un fondo asina, mester conta tanto pa inversionistanan tanto local como internacional. Aruba conoce cesantia pa hopi aña y recien na Hulanda e sistema a cambia, unda a bin cu algo parecido yama transitsie veroderding. Kisas esaki ta un idea con el a wordo haci eynan y kisas ahusta na e situacion manera cu e ta aworaki.
E manera cu cesantia ta wordo calcula, e no ta yuda y e cesantia ta pa yuda e transiscion di un dunado di trabao pa un otro dunado di trabao, pero mirando con cos a cambia, ta dificil pa bisa cu e cesantia cu e pago ta uno adecua, pa e daño cu e trahado ta sufri, segun mr. Hose Figaroa, abogado di sindicato Federacion di Trahadonan Arubano, FTA.