Durante e conferencia di prensa di partido AVP Sr. Jeffrey Kelly a cuminsa ta splica riba e Ley di Ortografia di Papiamento.
E ley aki a yega parlamento na fin di Maart y durante reunion di Comision Central a fiha un fecha pa entrega preguntanan pa loke ta regarda e ley aki, pa asina duna sosten na e ley aki segun e parlamentario.
Unabes cu e contestanan drenta, e ora Presidente di Parlamento lo bay over pa yama un reunion publico, caminda lo trata e ley aki. Mirando cu papiamento a wordo introduci como vak den enseñansa, tempo cu e Ciclo Basico a wordo introduci na 2006. Por mira cu e meta principal ta pa trece claridad den e ortografia di Papiamento y haci’e mas facil pa aplica.
Ortografia cu nos conoce ta data di 1976. Y pesey a bin cu cierto adaptacionnan pa establece un ortografia nobo di Papiamento. Na 1976, eilandsraad di e tempo ey, a tuma un decision pa establece un ortografia di Papiamento. Na 1986, ora cu Aruba drenta den su Status Aparte, e decision aki a wordo adopta via un Algemene Overgangsregeling en Bestuur, Landsverordering Schrijfswijze Papiamento.
Na 1992, un comison a wordo apunta pa amplia e reglanan di ortografia di papiamento y trece mas claridad y simplicidad den e idioma papiamento pa trece uniformidad. Dus pa tur hende skirbi papiamento, uzando e mesun ortografia.
Sr. Jeffrey Kelly, a sigui bisa cu tin cierto palabranan cu nos ta pronuncia pero ta skirbi nan nos manera. Palabranan manera “straño” of “stranjo”. Palabranan manera koekie. Dus esey ta establece e ora ey un necesidad pa nos pasa e ley aki mas pronto cu ta posibel. Parlamento aworaki ta en espera di e contestanan di gobierno pa asina e reunion wordo yama y trata mas pronto ta posibel.
Enberdad cu tin dos proyecto piloto ta andando, caminda cu e muchanan desde prome aña, te cu vierde klas, nan ta haya les den idioma materno y den vijfde klas nan ta haya otro idiomanan. Esaki ta fortifica e hecho aki, mirando e importancia di Papiamento como lenga na Aruba. Sr. Kelly ta completamente di acuerdo, pa e ley pasa mas pronto posibel, mirando cu Papiamento ta di nos tur ya cu tur ta stima nos lenga, y door cu nos stim’e nos kier papi’e bon y skirbi’e bon.
Tin gruponan, manera p.e. Sr. Jossy Mansur q.e.p.d. Y Sr. Todd Dandare, cu ta linguistanan cu durante añanan a wordo acerca, cu nan diferencianan di opinion pero naturalmente, despues di a reuni cu diferente grupo, importante tabata ta, pa yega na un producto final y awo e ley aki, ta papia di cierto reglanan ora ta papia Papiamento, y tambe e ta duna un lista di palabra, un woordenschat, di palabra (nan) cu ta wordo uza na Papiamento.