Awor cu tin e ley di kinderopvang, esaki ta bira hopi mas miho pa por hiba controlnan na e centronan di cuido di mucha pa cual Sra. Natasha Gilkes Pedagogisch Medewerker na Fundacion Pa Nos Muchanan ta splica.
Dia 5 di Juni tabata un dia hopi importante pa Fundacion pa Nos Muchanan, pero tambe pa nos centronan di cuido di mucha, mayornan cu ta scoge pa hiba nan yiunan na e centronan aki y tambe e muchanan cu ta bishita e centronan aki. Awo Aruba tambe tin su ley di kinderopvang.
Algun aña atras Fundacion Pa Nos Muchanan a traha hunto cu otro instancianan a traha ariba e adaptacion di e ley existente e tempo aya y asina trece e urgentieopleiding, cual tabata dirigi ariba e lidernan pero tambe cabesantenan cu e tempo aya tabata trahando den un centro pa asina engrandece nan conocemento ora ta trata educacion y cuido di mucha
E tempo aya, e ley no a pasa pero na 2015 un biaha mas Fundacion Pa Nos Muchanan a forma parti di e comision cu a traha ariba e handleiding y esaki ta bay conhuntamente cu e ley di kinderopvang y esaki ta un documento cu ta wordo uza pa implementacion di e ley aki.
Algun aña atras Aruba a ratifica e tratado internacional di derecho di mucha y akiden ta bin algun punto dilanti, e.o. Cu e mucha tin derecho ariba bon cuido, ariba siguridad y proteccion. Pesey ta hopi importante cu e ley aki a wordo aproba.
Mirando e trabao cu e lidernan ta ehereciendo, e ta un trabao delicado y hopi responsabel. Bo ta bezig ta cuidando muchanan. Aki Fundacion tin un rol importante, nan ta duna conseho na personanan cu ta traha cu mucha pero ta traha cu diferente workshops y diferente charlanan. Y un di e charlanan andando ta uno di siguridad, cual ta EHBO y esaki ta forma parti di siguridad. Como lider bo ta responsabel pa e muchanan, bo mester sa con pa tuma accion. Pesey fundacion ta dunando e cursonan aki. Nan tin hopi mas otro curso ta ofrece na e grupo aki.
Aworaki ta e caso, segun Sra. Gilkes ta splica, e centro mes ta dicidi cuanto lider nan ta pone pa tanto mucha. Aunke ta tarea di Fundacion Pa Nos Muchanan, pa duna conseho ariab esaki cual ainda nan ta haciendo. Pero aworaki p.e. Den e ley ta stipula cu si bo ta wak pa baby dus di mucha di 6 siman pa 1 aña y maximal 6 baby pa un lider. Asina e cantidad di mucha pa lider, ta para den ley. Tambe e parti di siguridad ta forma un parti hopi importante. Esaki tambe ta bin den ley. Tur lider cu ta traha cu mucha mester tin un carnet di CPR y EHBO, y cada aña mester renoba esaki. Higiena tambe ta un parti importante, ya cu ta traha cu mucha y e parti di higiena mester ta na ordo.
Asina tin varios punto dilanti di leynan cu ta trece adaptacion y ahustacion y tur centro lo haya e tempo necesario pa adapta na e ley aki. No tur centro ta mescos. Pa cada centro e ahustacionnan ta diferente. Pero naturalmente, nan ta bay haya tempo suficiente pa traha ariba esaki tambe. E meta principal di e ley aki ta pa eleva e calidad di cuido di nos muchanan, segun Sra. Natasha Gilkes, di Fundacion pa Nos Muchanan.