TEL AVIV, Israel- Un proyecto di ley cu ta permiti pa establece un comunidad “totalmente hudiu” a provoca un disputa na Israel. Algun parlamentario Arabe a bisa cu ta trata di un iniciativa “mas racista” di e gobierno di Israel.
E future ley aki, Ley Nacional, cual su prome lectura a wordo aproba pa Knesset na april, ta conta cu e apoyo di e prome minister Israeli, Benjamin Netanyahu, pero a wordo rechasa pa president Reuven Rivlin, cu a scirbi un carta habri tocante esaki y varios partido di oposicion.
E formacion ultranacionalista Yisrael Beiteinu di e minister di Defensa Israeli, Avigdor Lieberman, tambe a anuncia su oposicion, kisas pasobra cu e ta afecta mas di mil inmigrante hudiu naci den e ex Union Sovietico cual Israel ainda no ta reconoce legalmente como hudiu.
“Patria historica di e pueblo Hudiu”
E propuesta di partido Likud di Netanyahu a indica cu “E Tera di Israel ta e patria historic di e pueblo Hudiu” unda cu “e estado di Israel a keda estableci”, cu ta “e estado nacional di e pueblo Hudiu unda cu e ta aplica su derecho natural, cultural y historic pa autodeterminacion”.
E concepto di e document ta establece cu e “derecho di autodeterminacion nacional den e estado di Israel ta specificamente di e pueblo Hudiu” y “Hebreo ta e idioma di estado, mientras cu Arabe tin un status special”.
E datonan di e ofician Central di Estadistica di Israel a indica cu e poblacion total di e pais ta rond di 8.5 miyon habitante na final di 2017. Di esaki, mas o menos 20% ta Arabier.