E ta wordo bisa cu e ta e alimento perfecto. E lechi materno, esencial pa e prome lunanan di bida di e baby, ta contribui na evita diarea y neumonia, ta faborece e digestion y ta reforsa e sistema imunologico, pero ningun hende por a imagina cu e tambe por ta un poderoso antibiotico contra superbacterianan.
Un grupo di investigador di e Universidad di Vanderbilt na Merca, a descubri cu e lechi materno ta contene antibioticonan natural cu por wordo uza den e bataya pa combati enfermedadnan resistente na medicamentonan.
Concretamente, ta e sucunan cu tin den e composicion di e lechi aki, ta loke tin un efecto anti-bacteriano.
Cientificonan awo lo tin cu ehecuta mas estudio y inspira nan mes den e propiedadnan di e lechi materno, pa desaroya remedinan nobo antibiotico.
Pero riba e caminda aki, e descubrimento aki ta genera un speransa nobo den e bataya contra bacterianan resistente na antibiotico, cu cada aña na Merca, ta enferma mas di 2 miyon di persona y cu ta causa 23 mil morto. “E antibioticonan den cual nos a confia durante hopi decada, ta perdiendo eficacia… y nos ta core e riesgo di bay bek den e epoca cu hende tabata muri di infeccionnan simpel,” Tom Friedn, MD, MPH, director di e Centronan pa e Control y Prevencion di Malesa (CDC) a bisa, refiriendo na e problema.
Busca otro alternativa di antibiotico
E prioridad di haya antibioticonan nobo y eficas ta urgente. E profesor Steven Townsend a bisa: “Nos ta cuminsa busca diferente metodo pa derota e bacterianan infeccioso. Pa inspira nos, nos ta dirigi na uno en particular, di e grupo B Strep.”
E ora eynan, a cuminsa na purba diferente lechi materno dona y a analisa e compuestonan di sucu – yama oligoacarido – y a observa cu nan tabata tin distinto nivel di eficacia y nan a traha den diferente manera di ataca bacteria.
Cientificonan a observa cu mientras cu e compuestonan di lechi materno prome ta sensibilisa e bacterianan, despues ta matanan, atacando e “biofilm” cu ta wordo crea ora cu un cantidad di difrente bacteria ta agrupa.
Esey ta hustamente, un parti interesante di e descubrimento aki, pensa den e desaroyo di remedinan antimicrobiano cu e capacidad aki: e sensibilisacion, cu ta yuda debilita e resistencia di bacterianan na antibioticonan, Townsend a splica, kende alabes ta lider di e estudio.
E dos proteinanan aisla di e lechi materno cu nan ta demostrando su capacidad como antibiotico ta: e lactoferina, activo contra e virus y infeccionnan pa fungus y bacteria, y Hamlet-Human Alpha-lactoalbimuna, cu ademas, ta mustra di ta prometedor pa vence e celnan tumoral.
E resultadonan a wordo presenta dia 21 di Augustus di 2017, den e reunion annual di American Chemical Society na Washington DC, Merca y publica den e revista ACS Infectious Diseases.
Lactancia materno ta crece na Merca
Segun cifranan di CDC, e tasa di lactancia na Merca ta creciendo.
Awo, 8 di cada 10 mama den e pais, ta duna nan baby pecho desde cu nan a nace. E datonan tambe ta refleha cu babynan ta wordo cria pa mas tempo: 55% di e babynan Mericano naci na 2014, a ricibi lactancia materno exclusivo te cu 6 luna, compara cu 42% na 2004.
Fuente: https://holadoctor.com/es/