Diadomingo 11 di December proximo cuminsando pa 9or di mainta, landamento sicnronisa lo cera e aña 2016 cu un competencia cu lo carga e nomber di Mini Arubaanse. E competencia di Mini Arubaanse ta uno enfoca riba diferente figuranan obligatorio cu e atleta mester por domina. Na banda di esaki, e atletanan lo landa e mes un rutina pa asina e huesnan haya un impresion di e nivel di cada atleta. Tur atleta por participa mientras lo reparti medaya pa e prome, di dos y di tres luga den cada categoria cua lo ta nobato, 10 and under, 11/12, 13-15 y 16/18.
Cada aña mas atleta den diferente edad ta incorpora nan mes den e deporte di landamento sincronisa. E club di sinchro Barracudas tin muchanan chikito te esnan mas grandi cu tur dia ta haya entrenamento bou guia di entrenadornan certifica. Den e region di Caribe, Aruba su atletanan di landamento sincronisa ta wordo considera un di e mihonan. Pa dos biaha consecutivo nos atletanan di landamento sincronisa ta logra gana medaya den e Weganan Centro Americano y del Caribe, un muestra cu nos ta riba e bon caminda. Un invitacion cordial ta tur amante di e deporte acuatico pa asisti na e competencia diadomingo awor y bin apoya nos muchanan di landamento sincronisa.
Un danki na Lotto, e loteria di Aruba cu pa medio di Comision di Subsidio cu a yuda subsidia e evento di landamento sincronisa “Mini Arubaanse”.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.