AUSTRALIA – E landado Australiano Grant Hackett a huy. Famianan di e campeon Olimpico di 1500 meter freestyle, a haci denuncia caba riba esaki. “Grant ta confundi y mester di ayudo pronto,” su tata, Neville Hackett, den media Australiano. “Si un hende mir’e, yama prensa, polis of famia Hackett. Grant, por fabor laga sa unda bo ta, nos stimabo y nos kier yudabo.”
Agresivo contra miembronan di famia
E ex landado profesional a wordo recogi un dia prome for di e cas di su mayornan door di polis. Hackett, cu ya pa un tempo tabata tin problemanan mental, lo a comporta su mes agresivamente contra miembronan di su famia.
E Australiano di 36 aña a wordo laga den libertad despues di algun ora y despues a somenta atrobe. Desde e momento ey ningun hende mas a wak’e, cual a caba de un preocupacion grandi cerca su famia.
Peliger p’e mes y sociedad
E campeon mundial un rato despues cu el a wordo laga den libertad, a pone un potret riba Instagram, caminda cu por a mira cu e tabata tin herida riba su cara. Hackett ta insisti cu su ruman homber a golpi’e. “Tur hende sa cu e ta un homber cu rabia,” segun e landado, di cual e mesun ruman a bisa e mesun cos riba dje den media. “Grant ta un peliger p’e mes y pa sociedad,” segun Craig Hackett.
Presidente di e Comite Olympico Australiano, John Coates, a reacciona den shock. “Mi ta preocupa hopi p’e y pa su famia. Nos lo duna tur sosten cu ta posibel.”
Hackett ta wordo mira como un di e miho landadonan di distancia largo. El a gana den e weganan di 2000 na Sydney, un medaya di oro pa e distancia di 1500 y 4×200 estilo liber. Cuater aña despues na Atenas, un biaha mas e tabata exitoso riba 1500 meter.
Fuente: RTL Nieuws