Diabierna anochi den CDGPT na Dakota a ranca sali otro grandioso Copa Don Elias Mansur. Despues di un bon wega unda Dakota y Estrella ta keda empata na 2, Dakota ta sali victorioso na penalties. Den e di dos wega di anochi ta La Fama ta sali victorioso na penalties despues di empata 1-1 cu Nacional. Diasabra a continua cu tres partidaso, Bubali ta haci e bida di RCA dificil den prome tempo, pero Kiliam Toro den di dos tempo ta drenta anota y asisti Maurice Escalona pa RCA gana 2-1. Den di dos wega di anochi Riverplate ta vence Caravel 2-0 y anochi ta cera cu Dakota derotando La Fama 2-0 y Dakota ta bolbe yega otro semi final di Copa Don Elias Mansur. Diadomingo ta habri cu otro empate (2-2) entre Estrella y Nacional pero na penalties Carlos Geerman ta bira e heroe pa Estrella ora e para e penalty #10 y Estrella ta piki 3 punto. Di dos wega di dia e Tricolornan ta domina di tempran pero no ta anota te na 33 minuut, y RCA ta gana Caravel 4-0 pa clasifica pa semi final. Ultimo wega diadomingo Riverplate ta gana Bubali 3-2 den un bataya di kita sombre cu Batleman Quandt anotando e gol di victoria faltando 5 minuut pa e wega termina. Asina Riverplate tambe ta clasifica pa semi final. Diahuebs awo “un tabla lo bula” pa 9or di anochi ora e “Guerilleronan Berde di Savaneta” La Fama topa e “Naranjada di St Cruz” Estrella pa dicidi e ultimo luga pa semi final, pero mesun diahuebs 7or anochi Abejanan di Dakota y Dragon di Nacional lo entreten’e e publico cu otro wega di Grupo A. Diabierna tin dos wega di Grupo B, 7or e tradicional “Derby di Capital” RCA vs Riverplate y 9or anochi Piratanan di Angochi Caravel vs e Hulk di Bubali. Diasabra lo tin dos wega di semi final 7or y 9or. Diadomingo porta ta habri 12or cu un torneo infantil, 5or lo tin un grandioso challenge di Damas entre RCA y Dakota. Pa 7or ta e gran final di Copa Don Elias Mansur 2016.