Centro di Coordinacion y Rescate di Kustwacht a detecta cu radar riba diadomingo, mas of menos 5’or y 45 di atardi, un embarcacion sospechoso parti pazuid di Aruba. Un patruya for di punto di sosten Aruba, a sali bay cu Super RHIB pa asina establece contacto. Riba mas of menos 4 miya zuid di Barcadera, a bin topa cu e boto. Dos miembro di kustwacht a bay abordo y a haya varios bestia exotico. Douane y Servicio di Imigracion a wordo poni na altura di e hayazgo y e boto a wordo hiba na waf di Barcadera. Fuera di e bestianan, entre otro 4 mini Macaw (lora), un Jaguarundi, un Ocelot, 11 Toucan, dos Tamarin Monkeys, tres Cocker Spaniel y 1 Great Dane, un bull terrier y 6 turtuga. Fuera di esey tambe nan tabata tin un cierto cantidad di slof di sigaria y tambe gasolin abordo. E boto, tur e bestianan, sigaria y gasolin a wordo confisca pa Douane. E capitan tambe a haya un proces-verbaal for di Douane pa contrabandea dicho mercancia y bestianan. For di Kustwacht tambe el a haya un proces-verbaal pa falta di documentacionnan necesario pa e boto.