WILLEMSTAD – Kustwacht Caribisch Gebied (KWCARIB) a intercepta riba diaranson, dia 19 di October, un cargacion grandi di droga riba un “Go-fast”. E Dash8 avion di patruya di Kustwacht, cu a caba di bin di Haiti, caminda cu nan a duna asistencia despues di e pasada di horcan Matthew, a detecta un embarcacion sospechoso cu tabata mas of menos 40 miya noordwest for di Corsou. Tabata tin tres persona abordo.
E Centro di Rescate y Coordinacion (RCC) a wordo poni na altura y cutter Panter di Aruba y Jaguar di Corcou, a wordo manda den e direccion ey pa asina investiga e caso mas aleu. Dos Super -RHIB for di punto di sosten Corsou, tambe a wordo saca pa duna sosten. Den oranan di anochi, nan tabata por a intercepta e “Go-fast”. Tabata tin un cantidad considerabel di droga abordo. Despues di investigacion a bin resulta cu ta trata aki di 398 kilo di marihuana. E tres miembro di tripulacion, dos di nacionalidad Jamaiquino y uno di nacionalidad Hulandes, a wordo deteni di biaha. Hunto cu e embarcacion y e droga, e detenidonan a wordo treci na e punto di sosten na Parera. Eynan e tres sospechosonan y e droga a wordo poni den man di polis.