WILLEMSTAD – Kustwacht Caribish Gebied (KWCARIB) riba dialuna, 24 di October, a intercepta un Go-Fast cu un cargacion basta grandi di droga. E operador di radar di e Centro di Rescate y Coordinacion (RCC), a detecta rond di mey anochi un embarcacion sospechoso parti pazuid di Cas Abao, Corsou.
Dash-8, e avion di patruya maritimo di Kustwacht y un Super-RHIB di punto di sosten Corsou, a wordo manda den e direccion eynan pa asina investiga e caso. Na e sitio, nan a bin topa cu un Go-Fast sin tripulacion. Posiblemente e tripulacion lo a huy despues cu nan a wordo descubri door di Kustwacht.
Tabata tin un cantidad significante di droga abordo. Na comienso di e investigacion parce cu tabata trata di 15 bulto di casi 400 kilo di posiblemente cocaina. Cuerpo Policial di Corsou a wordo informa y a haci un buskeda riba tera, pero no a topa cu ningun hende. E boto y e droga a wordo hiba na Parera. E droga a wordo pasa pa Cuerpo Policial cu hunto cu Kustwacht lo bay haci un investigacion. Esaki ta di dos biaha den menos cu un siman cu un cantidad grandi di droga ta wordo intercepta.