WILLEMSTAD, Corsou – Riba e anochi di diamars, 11 di October, Kustwacht Caribisch Gebied (KWCARIB, a detene 13 persona ilegal, kendenan a purba di drenta Corsou. Tur tabata tin nacionalidad Venezolano. Un cierto cantidad di droga tambe a wordo haya.
Diamars, pa mas of menos 4’or di mainta, operador di radar di e Centro di Rescate y Coordinacion (RCC) di Kustwacht, a detecta un contacto sospechoso riba e radar zuidwest di Corsou, na altura di San Juan. Un Super-RHIB for di e punto di sosten di Kustwacht Corsou a wordo poni den marcha di biaha. Na e sitio, tripulacion di e Super-RHIB a topa un “Go Fast”. Tabata tin 13 persona abordo, consistiendo di 4 hende muhe y 9 hende homber. Investigacion a mustra cu tur a purba di drenta e pais ilegalmente. Tambe un cantidad di droga a wordo haya. E personanan aki a wordo deteni y hiba na e punto di sosten na Parera, caminda cu nan a wordo pasa pa polis. E droga a wordo confisca y tambe pasa pa polis. E caso aki ta wordo investiga hunto cu Kustwacht. E “Go Fast” a wordo mara na e punto di sosten di Kustwacht Corsou.