Diadumingo merdia e kraan biew di APA a wordo desmantela. Dennis Wever kende ta un consehero pa APA a conta cu e tabata presente tempo cu a lanta e kraan ya cu el a forma parti di e ekipo cu a traha e containerhaven. Segun Wever, apesar cu e ta haya di un banda pica cu mester desmantela e kraan, esey ta parti di bida mescos cu nos ora nos bai cu pensioen. E kraan aki a wordo uza durante mas cu 30 aña pa baha e carganan pisa for di barconan.
Dennis Wever a forma parti di e ekipo cu a traha riba e plan strategico pa basha e kraan abou. No a logra basha e kraan di biaha abou diabierna ya cu e dwarsbalken no a wordo corta suficiente y esey a pone cu ora a trek e kraan, e kabelnan a kibra. Pa e motibo aki a pospone e desmantelacion pa diadumingo ya cu mester a corta e dwarsbalken un poco mas y haci’e mas zwak ya ora cu a purba un biaha mas, e desmantelacion a bai den un solo biaha.
E material lo wordo corta den pida-pida y bendi como “scrap”. A delibera kico lo haci cu e kraan bieu y apesar cu su structura tabata fuerte ainda, tabata dificil y caro pa haya piesa pa e tipo di kraan aki. A pensa riba e opcion pa refurbish e machine of pa bend’e pero ambos opcion no tabata factibel y pues APA a dicidi pa desmantel’e.
Cu e desmantelacion aki ta cera e era di e waf di Playa cual awor lo bay wordo uza pa turismo di crucero mas tanto. E containerhaven lo wordo uza pa e megacruceronan ya cu prome e kraan tabata den caminda. E waf di Barcadera lo wordo uza pa e parti di carga. Manera ta conoci a cumpra un kraan moderno for di Spaña. Esaki a wordo instala y ta den funcion pa casi un aña caba.