Na prome luga nos kier aclaria lo siguiente cu a sali den medionan di comunicacion aki na Aruba.
A sali den awemainta.com cu Sindicato di Polis no por kere cu Mando Policial ta midi cu dos midi. Tambe a sali den 24ora.com cu Sindicato di Polis lo ta rabia cu detencion di coleganan na momento cu a bai duna asistencia.
Sindicato di Polis di Aruba S.P.A. ta desmenti e alegacionnan aki cu a sali den e dos medionan aki cu sigur no ta sali for di nos seno. S.P.A. semper ta para pa su miembronan, pero ora cu tin investigacion andando, como un sindicato responsabel, semper lo busca mas informacion concreto y lo laga e investigacion cana su caminda pa asina no stroba esaki.
Pa es motibo aki, S.P.A. ta distancia su mes for di e alegacionnan/informacionnan falso aki.
S.P.A. ta haya lamentabel si, cu cierto medionan di comunicacion ta uza informacion for di hendenan cu no tin nada di haber of cu no sa nada di un caso pa asina mal informa un pais y e mal informacionnan aki ta wordo mal uza contra nos miembronan den medionan social den un forma cu S.P.A. no ta para pe.
Tambe S.P.A. ta lesando y scuchando diferente acusacionnan cu ta bin den direccion di nos coleganan/miembronan cu ta atacha nos Cuerpo Policial. Nos por a scucha con ta uza nomber di nos Korpschef cu tambe ta un miembro di S.P.A.. Cuerpo Policial Arubano ta un Cuerpo profesional y semper y cuando lo keda haya hende cu no ta di acuerdo cu e proceduranan cu tin den un organisacion profesional. Un departamento cu ta resorta bao di Cuerpo Policial a haci entrega di placa na cierto luga . E ta e tarea di e departamento aki y NUNCA di Korpschef. Esaki ta e procedura normal den cierto casonan pa cu e proteccion di e persona aki. Tur entrega di un recompensa tin un procedura pa mantene su mes na dje. Ta zona straño sigur pa esunnan cu no conoce e procedura aki y pio ainda pa esunnan cu no ta traha cu un procedura asina. Ta lamentabel si cu un persona por hinca su mesun bida y tambe di su famia den un problema serio, door di admiti publicamente kico e la haci y despues ta ayudo di polis mes e tin cu busca ora cu e problemanan aki bati na su porta.
Berdad nunca a perhudica ningun hende, ningun causa ni ningun nacion!