Sra. Anushka Tromp, e mas reciente victima di violencia domestico, pa hopi aña a traha na Kowloon Restaurant. E tabata un persona amabel y servicial, semper cu’n sonrisa atento, ora di atende cu clientenan di Take Away. Anushka semper tabata un empleado ehemplar, un miembro digno di e famia di Kowloon Restaurant.
Tabata pa motibo di salud cu e relacion laboral entre Kowloon y Anushka a termina, pero semper el a keda forma parti di e famia grandi di Kowloon. E amistad, e amor y e cariño inigualabel cu tabata existi semper a keda.
Tabata diabierna ultimo cu ainda Anushka a pasa saluda su ex- coleganan di Kowloon, como sifuera el a bin haci un ultimo bishita, pa asina dispidi di su colega, amistadnan y e restaurant camidna cu el a traha pa 20 aña largo.
Cu Anushka por hay sosiego eterno y cu Dios Tata Todopoderoso por duna su yiunan, Adrienne y Annelli y demas famia Tromp hopi forza den e momentonan dificil aki. Anushka lo keda biba semper den nos curason y den nos mente.
Cu Anushka sosega na paz.