Pa di dos aña consecutivo Koningin Wilhelmina Fonds Aruba ta bin cu un rifa cu hopi premio atractivo pa yuda recauda fondo. A acerca varios comerciante cu a yuda pa haci e lista di premionan posibel.
E premionan ta:
Un auto Chevrolet Sonic 2016
2 round trip tickets pa Amsterdam cu KLM
Un Mystery 7 days vacation incluyendo airfare y hotel cortesia di Maduro Travel
Gift certificate di 1000 florin cortesia di Setar NV
Money Card di Compa Leon di CMB na balor di 1000 florin
Gift certificate di 1000 florin cortesia Superfood
Un round trip pa Medellin, Colombia cortesia di InselAir Aruba
Un round trip pa Santo Domingo cortesia di InselAir Aruba
Un TW wrist watch cortesia di Boolchand’s
Gift certificate di 200 florin cortesia di Ling & Sons Super Center
Prijs pa rifa ta 25 florin pa un ticket y 500 florin pa buki. E sorteo lo tuma lugar dia 04 di December proximo. Ticketnan ta obtenibel na Botica Aloe y na oficina di Koningin Wilhelmina Fonds Aruba den Spinozastraat 9, net banda di Watertoren na Playa. Por pasa cmpra ticket na oficina entre 9am y 6pm.
Cancer ta un enfermedad cu no ta descrimina y ta ataca hende jong y di edad, muchanan, muhe y homber den tur famia. E ta un realidad cruel no solamente pa e pashent, pero tambe pa su famia y su otro sernan keri. Mundialmente e cantidad di hende cu cancer ta keda aumenta y na Aruba tambe nos conoce hopi caso di cancer.
Durante tur su añanan di existencia Koningin Wilhelmina Fonds Aruba a experencia un aumento den gastonan extra cu e enfermedad y tratamento di esaki. E gastonan di cuido di un pashent di cancer ta hopi halto y ora yega asina leu pa e pashent, e fundacion ta cubri esaki completo. E gasto di mas grandi ta e cuido di pashent na cas. Un cuido na cas ta costa bastante pero si e pashent di cancer acerca e fundacion aki pa motibo di no por cubri e costonan, e ta haya e ayudo gratis.
Ademas di articulonan manera cama, prothese etc, e fundacion ta percura pa guia pa e famia, un guia pa e pashent mes y e cuido na cas completamente gratis. Tambe KWF Aruba ta cubri transporte di cas pa Oncologie, di Oncologie pa cas bek y tambe pa bay dokter. Koningin Wilhelmina Fonds Aruba su enfoke principal ta riba duna informacion y prevencion.
Koningin Wilhelmina Fonds Aruba ta gradici un y tur comerciante cu a haci e rifa posible y awor ta haci un apelacion pa pueblo henter contribui pa e bon causa. Pa unicamente 25 florin, bo ta contribui pa yuda Koningin Wilhelmina Fonds Aruba yuda comunidad y alabes bo tin e chens di gana premionan sumamente atractivo. Pa mas informacion riba e servicionan di KWF Aruba por bishita e website www.koninginwilhelminafonds.com
Diasabra awor dia 15 di oktober miembronan di KWF Aruba lo ta na Stern na Tankileendert pa asina bo pasa wak e Chevrolet Sonic 2016 cu bo por gana y di biaha cumpra bo ticket. Nos lo ta presente for di 9am te cu 6pm. Nos ta warda bo sin falta!