Klapchi y gasolin no ta e miho combinacion cu por tin

0

“Siguridad ta primordial den nos operacion, tanto pa nos empleadonan, pa nos clientenan, como pa nos isla den su totalidad”, asina Sergio Schwengle, encarga cu operacion di Fuels Marketing & Supply Aruba (FMSA) a duna di conoce. E compania ta encarga cu distribucion di combustibel na stacionnan situa tur rond di nos isla, na aeropuerto y na WEB.
Internacionalmente por mira desgracianan grandi atrobe cu klapchi, pa cual ta subraya e medidanan di siguridad cu mester tuma pa preveni tipo di incidentenan asina. Mester tene cuenta cu na e stacionnan ta atende cu benta di gasolin y diesel na publico, cu cualkier chispa di candela por ta funesto.

“Ta pesey ta importante resalta cu klapchi y gasolin no ta e miho combinacion cu por tin”, asina Sergio Schwengle a enfatisa. Den mesun rosea e ta pidi publico pa abstene na tira klapchi den vecindario directo di stacionnan di gasolin y mescos cu nan trucknan di entrega. Ora mira trucknan acercando, evita tiramento di klapchi, pasobra e ta masha peligroso. Hopi hende no ta realisa e cantidad di combustibel cu e trucknan ta transportando, un risico grandi pa e chauffeur di e truck, pero tambe pa e vecindario unda e ta pasando.

Den esaki ta pidi mayornan pa tene e combersacion aki cu nan yiunan, specialmente esunnan cu ta tira klapchi sin supervision di mayornan. Tin biaha como mucha no ta midi e peliger na un forma consciente y ta tuma e peticionnan menos serio.

Fuels Marketing & Supply Aruba desde 1 di October 2016 ta resorta bou di Refineria di Aruba N.V. Nan tin 36 empleado bon prepara y capaz pa suministra tur 13 stacion di combustibel na Aruba y na nan operacion na Aeropuerto. Nan tin 13 truck moviendo riba caretera y 8 truck riba rampa na Aeropuerto, unda nan ta tank avionnan cu Jetfuel. Anualmente e compania ta entrega mas o menos 200 miyon liter di combustibel na Aruba, den un forma sigur y eficiente.

“For di awor caba mi kier probecha pa desea henter nos isla un feliz cambio di aña y cu e aña nobo trece hopi felicidad, salud y prosperidad pa un y tur”, asina Sergio Schwengle a termina bisando.