Anualmente a bira e tradicion di Kiwanis Club of Young Professionals Aruba ta presenta nan proyecto ‘Christmas in a Box’. Aki cu ayudo di pueblo di Aruba y comerciante nan ta haci entrega di basket na diferente famia.
Christmas in a Box a cuminsa como un proyecto chikito entregando 40 famia di menos recurso, un basket cu diferente producto di primera necesidad. Segun aña nan ta bay e cifra aki tambe ta bira mas grandi. Yudando asina nos muchanan y nan famia nan den nos comunidad.
E aña aki no ta uno diferente. Miembronan di KYPA lo ta colectando comestibles, co’i hunga y tambe donacion efectivo na Superfood Plaza diasabra 3 di December y diadomingo 4 di December. Aki lo colecta pa asina por hasi 80 famia cu tin mas mester, feliz pa e temporada di Pasco.
Conhuntamente cu Fundacion pa Nos Comunidad, nos lo sa di haci e famianan aki poco mas feliz pe temporada di fin di aña.
Un invitacion ta bay na pueblo di Aruba, pa yuda contribui. E por ta 1 producto por ehempel cuminda di bleki, aros, lechi, hariña of locual ta desea. Un simpel acto di generosidad ta acumula y bira grandi na e momento cu haci entrega di e basketnan aki na e famia.
No lubida, pasa Superfood Plaza diasabra 3 di December entre 10or di mainta cu 7or di anochi y diadomingo 4 di December entre 10or di mainta cu 4or di atardi y haci bo donacion.
Ban yuda KYPA sigui yuda y duna bek na nos comunidad.