Kiwanis Club of Palm Beach a haci un donacion na Cruz Corra di mas cu 10,000 florin, pa asina por sigui yuda victimanan di e reciente inundacionnan cu a tuma lugar na Aruba.
Durante un almuerzo na cede di e club, Directie di Cruz Corra a duna un splicacion di e sucedido durante e yobidanan reciente.
A ser menciona cu for di e diabierna prome cu e yobida a duna inicio nan a premira cu e yobida lo por a trece problema, y pa diasabra nan a premira e problemanan cu e yobida por a trece. Nan a mobilisa inmediatamente un grupo di 50 voluntario pa asina por haci un diagnostico di e situacion, y pa diadomingo e escala total di locual a socede por a ser ripara, unda diferente districtonan na Aruba a ser perhudica, pero en especial e districtonan di Madiki cu Palm Beach a sufri mas daño. A ser detecta un 250 casnan cu problemanan dor di yobida, for di cual 60 di nan tabata presenta un problema critico y tabata rekeri di hopi ayudo.
Na e momento ey tambe gobierno a acerca nan pa por traha conhuntamente pa confronta e problema, y asina a bin cu e proyecto “Hunto Nos Ta Yuda” cu lo centraliza e ayudo pa locual ta esnan afecta dor di e yobidanan. Ayudo aki na esnan den necesidad a cover for di matras te cu frigidaire y artefactonan esencial pa e famianan afecta.
Ta asina cu simultaneamente Kiwanis Club of Palm Beach tabata buscando un manera di por colabora cu esnan afecta dor di e yobidanan reciente. Manera su president Chejito a indica, “como club di servicio nos mester tin e posibilidad di colabora cu esnan den necesidad. Ta importante pa menciona cu Cruz Corra ta depende di donaticionan pa nan funcion, pa cual motibo donationan asina ta asina importante.
Kiwanis Club of Palm Beach, di su banda, tambe ta un club cual ta centraliza su atencion especialmente na ayudo na muchanan den necesidad, cu diferente programanan na skol manera “Terrific Kids”, of iniciativanan manera e Santa Claus Trolley Event, unda 75 muchanan lo ser transporta for di San Nicolas pa un atardi na Oranjestad cu Santa Claus, regalonan y mas.
Den e caso di Kiwanis Club of Palm Beach, nan donaticionan ta posibel danki na fondonan recauda dor di evenementonan manera e tradicional Carnival Masquerade Party, cual pa 2017 lo celebra su di 20 aniversario como parte di e celebracion di Carnaval na Aruba.
Kiwanis Club of Palm Beach Aruba ta forma parti di Kiwanis International, un organisacion mundial di voluntario dedica na cambia mundo, cuminsando na un comunidad y un mucha. Nos ta un organisacion den crecimento, dedica na yuda muchanan di mundo henter hisando nan calidad di bida. Pa mas information di Kiwanis Club of Palm Beach bishita nos webpage na www.kiwanisclubpalmbeach.com of nos Facebook fan page na https://www.facebook.com/kiwanispalmbeach.