Recientemente, Kiwanis Club of Aruba a haci algun donacion na varios fundacion, cu ta eherce diferente trabou beneficioso den nos comunidad. Awendia no ta facil pa mantene un fundacion riba pia y ta exigi hopi tempo, esfuerso y dedicacion pa por logra e metanan.
P’esey mes Kiwanis Club of Aruba ta haya sumamente importante pa aprecia y duna sosten na e fundacionnan aki, p’asina nan sigui eherce e trabou debidamente, cu na final ta na bienestar di nos propio muchanan y comunidad.
E miembronan di Kiwanis Club of Aruba su “Child Protection Committee” a bishita Casa Cuna, pa asina cumpli cu e deseo di e famia di e angelitonan Eugene Frans y Rishandroh Anastacia, cual nan fayecimento tragico a conmovi Aruba completo algun siman atras. Presidente di Kiwanis Club of Aruba, sra. Norma Brinkenberg –Spellen, a gradici Casa Cuna pa e cuido cu nan ta duna e muchanan, cu pa diferente circunstancia ta bin bou nan cuido y asina contribui cu un un donacion di AWG 750.
Kiwanis Club of Aruba a bishita Fundacion Hende Muhe den Dificultad y durante e bishita ameno a ricibi informacion extenso di e diferente proyecto y servicio cu Fundacion Hende Muhe den Dificultad ta haci pa comunidad di Aruba. Kiwanis Club of Aruba a su duna aporte pa asina yuda e fundacion, cu un proyecto di conscientisacion pa preveni y combati abuso y violencia contra hende muhe y mucha na Aruba.
Kiwanis Club of Aruba a elegio e bon trabou cu Fundacion Hende Muhe den Dificultad ta haci pa comunidad di Aruba. Presidente di Kiwanis Club of Aruba, Sra Norma Brickenberg Spellen, a haci entrega di e check cu e suma di AWG 1.050,- na Sra. Magaly Maduro den presencia di e miembronan Claudiene Ho Kang You y Edalitza Weller.
Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informacion di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba. Tambe por bishita e website di Kiwanis Internacional na www.kiwanis.org.