DEN HAAG, Hulanda- Tweede Kamer no ta e miho refleho di e sociedad. Esaki segun dos miembro nobo di Tweede Kamer, den e di diez episodio di e serie Haagse Nieuwe’. Miembro di Tweede Kamer, pa PvdA, Kirsten van Hul a bisa cu e tin rabia riba e falta di hende muhe den politica. Martin van Rooijen di 50Plus ta haya cu, al contrario, tin falta di mas persona di edad avansa den Tweede Kamer.
Como columnista, Kristen van den Hul pa añanan largo a scirbi tocante emancipacion den e cuestion di genero. Riba su lessenaar tin un buki Feminist with a to-do list.
Segun Van den Hul, hopi hende ta haya manera un sorto di alergia manera cu nan tende e palabra ‘feminismo’. Al contrario, e mes ta orguyoso di esey. “Mi ta un feminista Y mi ta encanta e hende homber. Mi ta bisti hilchi halto. Pa algun persona e cosnan aki no ta compatibel, nan no ta klop”.
Van den Hul ta un gran defensor di mas hende muhe den politica. “Decisionnan politico mester wordo haci door di personanan cu ta refleho di loke di personana cu ta mester representa”.
Tambe miembro di 50Plus den Tweede Kamer, Martin van Rooijen ta haya cu e actual Tweede Kamer no ta un bon refleho di e comunidad. P’esey e no por ni yama Tweede Kamner un representacion di pueblo. “Tin casi 4 miyon persona riba 60 aña. Esey ta representa 40% di e electorado, cu ta wordo representa door di 5% so den Parlamento. Esey ta ridiculo”.
E ingeniosidad di Job Cohen despues di e asesinato di Theo van Gogh tabata pa Kirsten van den Hul un motibo importante pa drenta politica activo. “E tempo ey mi a wak solamente un partido cu tabata den contacto cu e pueblo. Esey tabata PvdA. Loke ta trece e miho resultadoann ta dialogo. Y no e machismo cu gestonan grandi y tampoco e gritonan. Esey Cohen a mustrami es tempo ey”
Pa Martin van Rooijen di 74 aña, Binnenhof ta tereno conoci. Den añanan 70 e tabata secretario di estado di Finanzas y despues a bira parlamentario pa CDA. For di 2015 te cu 2017, e tabata miembro di 50plus den Eerste Kamer. Den e añanan cu e tabata for di politica, el a forma un carrera den e mundo di negoshi. El a traha na Shell y na NMA, y tambe e tabata dirigente di KNVB.
Cu awo tin masha poco miembro di Parlamento cu experiencia den e mundo di negoshi, segun van Rooijen ta un lastima.”E perdida aki ta bira mas grandi awo cu mas hoben ta drenta Parlamento. Dimes cu nan tin masha poco experiencia, y mucho menos den e mundo di negoshi.
Fuente: www.nos.nl