PARIS, Francia – Kim Kardashian a wordo atraca den e apartamento cu e tabata huur na Paris diadomingo anochi, segun su vocero a bisa CNN.
“Kim Kardashian West a wordo atraca dentro di su camber na Paris awe nochi, pa dos homber enmascara bisti como oficial di polis. E tabata hopi perturba, pero sin daño fisico,” Ina Treciokas a bisa.
Ministerio di Interior Frances a bisa cu cinco homber arma a menasa e concierge cu un arma y a boei’e y a oblig’e pa habri e apartamento priva. Dos di nan a logra drenta.
Kardashian a wordo cera den baño, mientras cu e hombernan a bay cu dos telefon celular y joyas na balor di miyones di dollar, un vocero di e ministerio a bisa.
Entre e obhetonan horta, tabata un renchi balora na 4 miyon di Euro (4,49 miyon di dollar) y un joyero na balor di 5 miyon di Euro (5,6 miyon di dollar), segun vocero di Ministerio Publico di Paris.
Kim tabata na Francia pa asisti na e Paris Fashion Week hunto cu su mama Kris Jenner y su ruman muhe Kendall Jenner. Despues di a papia cu polis, Kardashian a bay for di e pais Europeo.
Su casa, e rapero Kanye West, a laga abruptamente un concierto den Festival Meadows na New York, ora el a haya sa di e incidente cu su casa a sufri.
Fuente: CNN en Español