Diabierna ta cerca. Riba e dia aki specificamente, 4 di Augustus, ta unda cu e partidonan politico lo bay entrega nan lista “victorioso” na Conseho Supremo Electoral. Pero con bon nos conoce e candidatonan cu a dicidi di bay purba nan suerte den politica. Ta hendenan cu nos por confia?
Riba Facebook y tambe e otro medionan social, sea Twitter, Instagram, etc. nos por mira con algun di nan, mayoria parti esunnan cu ta mas popularidad, ya ta conoci caba di kico nan ta capas, con nan antecedente ta, etc.
Pero kico ta di esunnan menos conoci. Nan a pasa un screening si nan no tin un pasado dudoso, si nan a yega di pertenece na algun organisacion criminal, of en berdad nan ta hendenan intachabel cu berdaderamente nan por contribui grandemente den nos comunidad, sea como minister of parlamentario?
Nos a tuma nota cu tin algun partido a sa di tuma algun persona, pa no bisa “individuo”, cu tur respet, cu tin un curiculo sumamente impresionante. “Too good to be true”. Anto esey ta pone ami duda, si mi ta bay vota pa un hende asina. Ta bon pa sugeri, pa no bisa “conseha” partidonan cu a tuma, Jan, Piet, Klaas, en allemaal, riba nan lista, sin sa berdaderamente cu esey ta loke nan a studia p’e, of esey ta loke nan ta eherce, djis pa tin un lista “victorioso”. Ainda boso ta na tempo, revisa 10 biaha boso lista prome cu yega pone hende ken cu ta riba dje, pasobra bo no sa ki desaster e persona, of personanan aki por crea pa bo partido.
Haci un background check, conoce bo candidato bon. Un politico mester ta intachabel, y no un Hermano Coco cu ta djis yega bin bisa, hey, ami kier subi lista, pasobra mi tabata dokter den antropologia. Shonnan, no ta asina nos mester tene nos politica. Nos hendenan mester ta studia, nan mester sa kico nan ta haci y papia, cana puntra rond, wak ken ta su hendenan. No yega pone ken cu ta. Corda, no ta bo partido bo ta bay beneficia den esaki, sino Aruba henter. Nan mester tin gobernantenan di taya, cu por saca nos pais padilanti, cu por contribui na nos bienestar y forma e base pa nos muchanan, kendenan lo bay goberna nos pais despues di nos.
Y abo, kende proximamente kier bay forma parti di un ke otro partido politico, sea honesto cu bo mes y cu pueblo. No bende algo cu bo sa cu no ta asina. Promove bo sabiduria, con bo por yuda bo pais y no solamente cana critica of ofende hende, keriendo cu esey por hacibo popular.
Popular lo bo bira si bo por trece un solucion na e problemanan cu nos pais ta enfrentando actualmente, kico abo como politico por haci pa yuda remedia esakinan.
Ainda boso ta na tempo pa crea e lista “victorioso” pa boso partido. Boso tin 4 dia pa revisa boso lista 10 biaha.
Lia Tromp