CARACAS, Venezuela- E compania Mericano Kellogg’s a anuncia diamars cu a stop cu su operacionnan na Venezuela y a atribui e medida di deterioro di e situacion economico y social, segun un comunicado.
E salida di e compania di alimento a tuma e trahadonan di sorpresa, y un grupo di nan a keda den e portanan di e unidad local na casi 100 kmn di e capital. Nan a keda sin por a drenta e instalacionnan, segun fuentenan di e sector industrial den e region.
E compania, un di e poconan cu ainda tabata sigui produci cahanan di cereal den e pais, a bisa cu e decision ta definitivo.
Companianan manera Clorox, Kimberly Clark y General Motors a bandona e pais den e ultimo añanan di mesun manera, agobia pa e recesion cu ta persisti pa cinco aña y e prome hiperinflacion cu tin na Venezuela.
“E deterioro di e situacion economico y social den e pais a obliga e compania na stop su operacionnan y sali”, e compania Mericano a bisa den un comunicado, sin precisa e cantidad di empleadonan cu ta keda sin trabao.
Autoridadnan Venezolano den pasado a ocupa e fabricanan cu e compania stranhero a laga den e pais, pa purba pa e fabricanan sigui produci cu nan ex empleadonan.
E salida di Kellog’s ta yega mei mei di e tensionnan cu pa lunanan ta persisti entre e companianan y gobierno, cu ta purba stop e subidanan di prijs. Pero gobierno tampoco ta bende e divisa na e cambio oficial na e companianan cu ta produci masha poco pa falta di material of bentanan abao.