Scirbi pa Clyde Harms
Den diccionarionan, e palabra “kadans” ta representa un configuracion melodico o harmonico di por lo menos dos acorde cu ta conclui un frase, seccion of un pieza. Despues di e concierto di diasabra anochi na e aula di Universidad di Aruba, Kadans ta representa un entidad musical nobo riba escenario musical di Aruba. E ta un coro di apenas 13 cantante bou di direccion di Tettie Wiechers pero cu a demonstra un calidad halto. Cinco soprano: Duanca de Werd, Annemarie van den Berg, Mechtild Thode, Suzy Arts, Cynthia Smith; tres alt: Leontine Merkies, Hanna Lanting, Angela van Ruyven y cinco bas: Dick Melchers, Mari de Werd, Piet Dieleman, Reint Schutter, Rob van der Vaart.
E grupo tin mas o menos un aña ta reuni un bes pa siman pa canta hunto. Den e epoca di pascu nan a haci algun presentacion na diferente cas y e tempo ey nan a dicidi di formaliza e coro bou nomber di Kadans. E meta di Kadans ta pa desaroya un repertorio varia di musica cu orientacion clasico y di obranan theatral.
Diasabra nochi den e precioso aula di Universidad di Aruba, un tempo un capia di monhanan Dominicanessen, Kadans a duna su prome concierto publico. Nan no por a scoge un luga miho pa strena e coro. Cu acustico hopi zuiver, e aula historico y chikito ta duna e publico un sentido di intimidad cu e musiconan. E sala tabata “sold out”.
Cantando strictamente a capello, Kadans a impresiona mi cu e disciplina cu e directora Tettie Wiechers a crea entre e participantenan. E diferente bosnan tabata reacciona un cu otro manera e instrumentonan di un orkesta sinfonica ta “papia” cu otro.
Un otro cos cu a impresiona mi masha tabata e bosnan masculino. Contrario na e mayoria di coronan mixto na Aruba, nan tur ta bas y nan ta forma un parti relativamente grandi di e coro. Nan stem tabata resona fuerte y tabata duna un dimension musical cu nos no ta costumbra cu ne.
Cu su programa inaugural, Kadans a demonstra cu ya nan a desaroya un repertorio basta varia: Tabatin musica di Hugo Distler y di William Paxton; di Charlie Chaplin y di Pierre Arraignant, di John Frederick Bridge y di Pierre Certon. Cu e cantica Gabriella’s Sâng di Steffan Nilsson aregla pa Carsten Gerlitz y Hanna Lanting cantando solo, Kadans a haya un tremendo aplauso. Na final di e concierto, ora cu Hanna a ricibi un bouquet di flor, atrobe e publico a premi’e cu un aplauso fuerte.
E programa inaugural tambe tabatin su variacion. Ryan Maduro a percura pa dos intermezzo instrumental y a hypnotiza e publico cu su guitara clasico tocando entre otro, Andreina y Natalia di e Venezolano Antonio Lauro y The girl from Ipanema di e Brazileño Antonio Carlos Jobim.
Den un otro intermezzo, e trio di blokfluit, consistiendo di Mechtild Thode, Suzy Arts y Angela van Ruyven, a deleita e publico cu un variedad di musica, incluyendo canticanan di pueblo di Merca, Hulanda, Israel, Sur-Africa y Italia. E ultimonan te hasta a inspira algun miembro di e publico pa canta cu nan na bos abou.
Pabien na tur miembro di Kadans pa un concierto inaugural magnifico. Pabien na e cantantenan. Pabien na e directora. Pabien na Mechtild, Angela y Suzy cu un presentacion excepcional di blokfluit. Pabien na Ryan Maduro kende a laga nos paraliza cu su guitara.
Musicalmente, Aruba ta mas rico awe pasobra Kadans ta un joya musical.