Partido ReD ta haya cu tin un falta total di vision den maneho di agricultura na Aruba
Awa ta e prome necesidad pa practica agricultura. Pa un Arubiano practica agricultura cu exito ta depende si e tin suficiente acceso na awa. Nos tur lo kier come fruta y berdura for di propio suela, berdad? Pero nos tur sa cu Aruba su clima ta permiti plantamento exitoso solamente den tempo di yobida. Nos ta papia di mas o menos 4 luna pa aña. Pa sigui planta e resto di aña lo rekeri hopi boluntad, ingeniosidad y imaginacion di e cunukero. Y tambe inversion financiero costoso.
Gobierno a centralisa su maneho pa cu agricultura den e departamento di LVV mihor conoci como Sta. Rosa. Pero pa mas bon intencion cu tin na Sta. Rosa nos sa tambe cu nan no tin suficiente recurso pa bin cu innovacion riba tereno di agricultura. Nan tarea ta di promove agricultura pero mientras tanto nan no por combati e scarsedad di awa y no por crea e infrastructura necesario pa rescata mas awa di yobida. Pues promove agricultura na Aruba ta manera un grito den desierto. Tanten cu no soluciona e demanda pa awa no por planta cunucu. Y riba dje gobierno ta tumando back aden masha hopi tereno cu ta destina pa agricultura. E terenonan aki ta wordo duna den erfpacht pa traha cas of ta destina pa traha espacio pa construi caminda.
Hopi tempo pasa sr Daniel Leo a laga traha damnan rond di Aruba pa warda e exceso di awa di yobida pa usa den tempo di secura. Esey nos ta yama maneho cu vision. Te awe ainda algun di e damnan aki ta fuente di awa pa cunukeronan. Pero awa di damnan ta limita y ta vulnerabel pa bira braak of e damnan ta wordo usa pa tira sushi aden y asina ta bira contamina. Tin algun posnan di awa dushi riba Aruba pero nan ta scars.
Awendia tin varios iniciativa priva, cu haciendo uso di technologia nobo ta cultiva y hasta exporta parti di nan cosecha pa exterior. Den e area di Mondi Fierno tin un tereno enorme caminda hobennan ta cultiva berdura y fruta pa e mercado local. Algo asina ta di admira y elogia. Y seguramente tur hende ta pensa cu nan ta haya ayudo of subsidio di gobierno pa nan projecto. Wel no. E awa (spoelwater) cu nan ta obliga di cumpra di WEB ta asina costoso cu apenas nan por paga pa e cantidad di awa necesario pa sostene nan plantacion. Y nan no ta haya un depchi di subsidio.
Aki ta caminda ta sinti cu gobierno tin un falta total di vision den su maneho pa cu agricultura.
Partido ReD lo hiba un maneho manera mester ta, e.o.
lo motiva hobennan pa bai studia na scolnan di agricultura den region pa despues bin aplica innovacionnan na Aruba ;
fuera di e damnan existente, lo crea mas posibilidadnan y infrastructura pa warda awa di yobida cu actualmente ta djies bai pa lama p.e. construi damnan nobo na lugarnan strategico;
zorg pa inclui den e diseño di panelnan solar un systema pa catch e awa cu ta cai riba e superficie;
lo crea incentivanan pa nos hendenan local cu kier dedica y biba di plantacion y cunucu, cu por ta:
otorga permiso pa regenbak y laga coba tankinan di awa. Promove y inclui construccion di septic tanks y inclui goot den bouwvergunning di tur edificio y casnan particular;
facilita plantacionnan y cunucunan cu awa di WEB esta awa cu ta wordu derema ora di spoela liñanan di awa di WEB, na un tarifa hopi reduci;
facilita plantacionnan y cunucunan cu awa di plantanan di purificacion di RWZI (Rioolwater Zuiveringsinstallatie);
crea oportunidad pa importa material y toolsnan necesario pa traha den cunucu y pa traha invernadero (broeikas) liber di impuesto of pagando impuesto reduci;
reduci tarifa di belasting tanto di ganashi como di uso di tereno landbouw;
Di e forma aki ta stimula agricultura local. Nos pueblo por haya berdura y fruta local na prijs pagabel y asina por afford di come mas saludabel y cuida su salud.