E judoka Isaac Croes cu actualmente ta residencia na Merca unda e ta combina su deporte y su scol a caba di representa Aruba den e torneo internacional renombra di judo esta e Cancun Grand Prix 2017 na e ciudad di Cancun, Mexico. Mester bisa cu e miho bringadonan di mundo den e deporte di judo a participa na e competencia aki y varios di nan medayistanan den e ultimo Weganan Olimpico di Rio.
Prome cu Isaac a sali pa Cancun e la haya e posibilidad di entrena cu dos seleccionado Mericano di judo esta Lakea Vargas -66 y Adonis Diaz -60 cu a invita Isaac pa e entrena cu nan na Miami. Den e competencia na Cancun, 3 continente, 38 pais y 183 competidor a participa. Coach di Aruba, Alexis Cardenas a guia Isaac Croes na e campeonato aki. Mester bisa cu dia 22 Juni e judoka Isaac Croes lo sali pa Mexico City unda pa dos siman y mei e lo permanece den un campo di entrenamento. Luna pasa e hoben Isaac Croes a competi pa Aruba den e Pan American Championship na Panama. Esaki tabata Isaac su prome campeonato grandi pa 2017 y awor esun di Cancun a bira su di dos. Ultimo informacion ricibi ta cu Isaac a cay venci den su combate contra di un peleado di Mexico.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atleta Isaac Croes y su coach Alexis Cardenas pa e torneo internacional di judo Cancun Grand Prix 2017 na e ciudad di Cancun, Mexico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.