Un hoben cu a haya un chens di parti Fundacion Hoodchamps pa bay Hulanda, pa wak si e tin e talento pa bira un hungador di basket profesional, a logra pasa su testnan pa cual awo ta cla pa sigui su soño y retonan pa e deporte aki pa cual aki Juan Hernandez ta splica mas di su biahe bek pa Hulanda.
El a splica cu el a siña hopi y e ta sinti cu e por nivela cu e hungadornan eynan. Hernandez a sinti su mes den un sistema nobo pasobra el a hunga otro mirando cu eynan tabata tin hunga cu hende mas grandi cun’e. El a desaroya cu e training y coach.
Hernandez ta bay bek Hulanda. Awor aki e ta bay hunga den un division cu yama Promotie Divisie y manera tin di compronde nan ta bay tin un coach di eredivisie y si e interesa den Hernandez, e por subi di nivel.
Awor cu e ta bay bek, e ta bay pa un meta. Esaki ta loke e tabata kier pa hopi tempo y por fin el a hay’e. Un banda e ta tristo pasobra e ta bay laga tur hende y tur cos atras. Pero si esaki ta loke e kier ta loke e ta bay p’e. Ta pa un bon motibo e ta bay Hulanda.
Na Hulanda nan a bisa Hernandez cu e por yega leu. No a menciona si e por yega NBA si, pero e lo por yega Eredivisie of hunga den divisionnan mas halto, manera rond di Europa, etc. Por tin un oportunidad pero si e duna di su parti, cual Hernandez a splica cu e lo duna.
Tin mas talento Arubiano cu ta hungando na Hulanda. Pa Hernandez, por lo menos e tin hende cu e conoce.
Actualmente e ta bay hunga pa Groene Uil di Groningen. Esey ta e Division di Promocion. Nan a sali campeon dos aña sigui.
Pa awor aki Hernandez ta pendiente pa nan proximo wega dia 31 di Augustus. E ta hopi excited pa e reto cu nan tin prepara p’e na Hulanda.