Durante e reunion tocante e ley di CITGO segun parlamentario di MEP mr. Juan Ady Thijsen partido MEP a entrega varios mocion y amienda. Un di e amiendanan tabata pa crea un fondo pa trahadornan di refineria. E suma lo tabata pa 10 miyon florin probeniente di e suma di areglo cu mester bay pa gobierno y lo a ser maneha pa Banco Central di Aruba. Tambe a amenda cu pa haci uso di e fondo mester tabata tin dos tercera parti di voto den Parlamento. E meta tras di e amienda aki tabata pa proteha trahadornan den e sector di refineria cu awor ta bay over den e diferente companianan cu ta ser lanta den cuadra di e ley di CITGO. Manera conoci aunke leynan local ta proteha derechonan di trahadonan hopi biaha toch ta surgi problemanan inespera den e sector aki. Asina ta fresco den memoria e accion di ex trahadonan di Valero ” si tin pa Valero, tin pa nos”. Parlamentario di MEP mr. Juan Ady Thijsen ta lamenta cu partido AVP ta scoge e caminda pa vota contra tur proposicion di MEP, mientras MEP si ta evalua cada mocion y amienda riba nan merito. Segun Parlamentario mr. Juan Ady Thijsen no ta prome biaha cu AVP ta laga trahadonan di refineria na caya. Na 2010 tambe partido AVP a vota contra un proposicion di partido MEP pa crea un fondo pa trahadonan tempo di e Settlement Agreement. Pues segun Parlamentario mr. Juan Ady Thijsen ayera a keda demostra un biaha mas cu AVP ta contra e clase trahado.