Materialnan cu a wordo uza pa e brug a wordo controla. Segun Jossy Kock di DOW, for di prome dia caba tabata tin expertonan cu a haci sondeo di ki tipo di suelo nos tin aki na Aruba, pa asina nan por determina ki tipo di material nan tin cu bay uza y vooral pa e parti di concreet, con fuerte e concreet mester ta. E brug a wordo construi na Colombia den pida pida y durante e construccion di e brug ey na Colombia, tin un ingeniero, un consultant bureau internacional cu ta audit henter e brug. Por cierto nan ta audit e proyecto mes di Green Corridor. Nan ta un consultant bureau independiente di tur otro instancia. Nan ta bin, wak si tur e materialnan a wordo uza corectamente. Si e ta cumpli cu tur exigencia internacional y a base di esey nan ta saca nan rapport.
E rapportnan ta bay pa e lendersnan, cual ta e banconan cu ta financia e proyecto. E banco tambe kier ta sigur cu locual cu ta wordo construi ta cumpli cu tur e exigencianan pasobra e banco kier su placa tambe. Ta e banco ta hincando e placa actualmente. Ta asina cu te na e momento aki brug a wordo dos biaha audita caba. Prome biaha ta na Colombia, durante cu ta trahando e brug den segmento. E audit eynan a bay completamente bon. E di dos audit a tuma como un luna pa un luna y mey atras. Ora cu e ingenieronan independiente a bin Aruba y a controla si tur cos ta cumpliendo cu e normanan. Hasta nan a controla si locual kico a wordo gewelder caba na e brug, ta cumpli tambe cu specificacionnan, Kock a splica.
Ora cu nan a caba di audita e brug pa di dos biaha, Jossy Kock, cu ta representando e proyecto di Green Corridor, a sinta cu nan y a combersa riba kico nan resultado ta di e audit di e brug. Te na e momento ey tur cos tabata bon. Tur exigencia cu ta poni riba papel a wordo cumpli. Kiermen locual kico nan a trece dilanti cu tin problema cu brug, Kock no ta kere esey pa motibo cu e forma cu durante reunion cu a ricibi for di e consultant, a indica cu te unda e brug ta, ta cumpli cu tur exigencia.
Kock a agrega cu e hendenan cu ta trahando riba e brug, ta hendenan cu tin mas cu 20 aña di experiencia trahando brug. Esey ta indica cu no ta hendenan manera cu ta yama den terminologia Arubiano, nobato, ta construyendo e brug. Ta asina tambe cu ningun lender ta bay permiti hendenan cu no tin e experticio riba e tereno ey traha riba un brug. Si bo permiti esey ta nifica cu e persona ey no tin e experiencia y por haya situacionnan fastioso cu algo por pasa. Esey no ta e caso, segun Kock.