GENEVE, Suisa – E apelacion den e caso contra e ex presidente di FIFA, Joseph Blatter, a wordo desestima pa e Tribunal di Arbitrahe Deportivo (TAS), segun a informa dialuna den un comunicado.
Blatter lo sigui suspendi for di actividadnan relaciona cu futbol durante 6 aña (desde dia 8 di October 2015) y tin cu paga un multa di 50 mil franco Suiso (un poco mas di 50 mil dollar).
E comite di etica di FIFA a dictamina na December 2015 cu tanto Joseph Blatter como michel Platini a kibra e Codigo Etico di FIFA relaciona cu conflictonan di interes, violacion di lealtad y ofrece y ricibi regalo.
Blatter y Platini tabata tin audiencianan disciplinario relaciona cu un pago di 2 miyon di dollar realisa na Platini na 2011 di parti di e organismo rector di futbol mundial y firma pa Blatter.
Ambos dirigente a bisa cu e pago tabata relaciona cu un acuerdo suscrito na 1998 pa cual Platini lo a ricibi e cantidad ey pa su trabao como asesor tecnico di e presidente di FIFA entre 1998 y 2002.
“Sr. Blatter a infringi e Codigo di Etica di FIFA, ya cu e pago ta ekivale na un regalo indebido y no tabata tin ningun base contractual,” e comunicado di TAS a bisa. “E Grupo Special a conclui ademas cu sr. Blatter a concedi ielgalmente contribucionnan na sr. Platini den e marco di plan di hubilario di e Comite Ehecutivo di FIFA, cu tambe a constitui un regalo indebido.”
E panel a determina cu e sancion imponi na Blatter no ta desproporciona, pa loke a confirma totalmente e decision apela, e comunicado ta bisa.
Ambos a wordo absolvi di e acusacionnan di soborono y corupcion.
Fuente: NTN24