Johnson & Johnson a wordo ordena pa paga 4.7 biyon dollar den daño na 22 muhe, kendenan a bisa cu productonan di talco a causa cu nan a haya cancer di ovario.
Un hurado na Missouri, Merca inicialmente a concede 550 miyon dollar na compensacion y a agrega 4.1 biyon dollar na e casonan mas severo.
E veridicto ta bin na momento cu e gigante farmaceutico ta bringando como 9 mil casonan legal relaciona cu su talco di baby.
J&J a bisa di tabata “sumamente desapunta” y a bisa di lo apela.
Den e caso cu a dura 6 siman, e muhenan y nan famia a bisa cu nan a haya cancer di ovario despues di a uza talco di baby como tambe otro productonan pa decadanan.
Di e 22 muhenan representa den e caso aki, seis a muri di cancer di ovario.
E aboganan a bisa cu e compania tabata sa cu su talco tabata contamina cu asbest desde decadanan di 1970 pero a faya den avisa consumidornan tocante e risico.
PROCESO INHUSTO
Talco ta un mineral y tin biaha por wordo haya den cercania di asbest.
J&J a nenga cu su productonan a yega di contene asbest y a insisti cu nan no ta causa cancer.
E gigante farmaceutico a agrega cu varios estudio a mustra cu talco ta sigur y a bisa cu e veredicto tabata producto di un “proceso fundamentalmente inhusto”.
E Food and Drug Administration (FDA) di Merca a laga haci un estudio di un variedad di muestranan di talco, incluyendo J&J, for di 2009 te cu 2019. Nan no a haya absest den niun di nan.
Ministerio Publico a bisa e corte di Missourti cu FDA y Johnson & Johnson a haci uzo di metodonan defectuoso pa haci e test.