Semper ta bisa pa haci’e mas dificil pa e criminal cu ta posibel. Si por deposita placa na un instituto financiero, ta conoci pa tin mas y miho siguridad, segun John Larmonie di Bureau Communicatie, Voorlichting en Preventie di Cuerpo Policial.
Si e comerciante por percura pa e placa ta na un instituto financiero lo ta hopi bon. Si bo ta bay haci’e na cas toch, e ora tin cu bay tuma hopi medida di siguridad. Tin cu traha un plan di siguridad personal. Tin cu corda cu si ta transporta placa, hende ta wak bo. Nan ta bay siguibo. Ta bay zorg e ora pa tin un bon plan traha y tin cu tuma hopi medida di siguridad na cas, cual ta descurasha esey. Si deposita e placa den un instituto financiero, haci uzo di geldtransport arma, e ora ta kita e elemento di risico for di bo mes. Bo ta paga pa un servicio pero bo placa ta sigura. Bo ta zorg e ora cu bo no tin perdida mañan y bo no ta pone ni bo mes, ni bo empleadonan na peliger.
Ultimo casonan cu a sosode, tin hende a keda herida, hende a keda cu trauma. Segun Larmonie, e riesgo ta pa bida di hende. Placa por wordo reemplasa mañan. Hopi kier corta costo, pasobra nan no kier paga mas. Kico ta bal mas, placa of bo mesun bida of di bo famia of empleado. Semper laga e siguridad personal di un persona bal mas cu e servicio cu tin cu paga p’e.
Si un hende no kier uza banco of transporte, e ora tin cu bay tuma hopi medida di siguridad. Tin cu sinta evalua bon e riesgo. Tur cos ta depende ki negoshi bo ta aden. Ta depende con visibel bo ta y cuanto placa bo ta transporta. E ora tin cu busca conseho di hendenan profesional pa sinta cubo, yudabo evalua e riesgo y bisbo cua ta e minimo medidanan di siguridad bo tin cu tuma pa bo ta safe.
Esnan cu mester di informacion esaki por ser duna di parti di Medewerker Bureau Communicatie, Voorlichting en Preventie Cuerpo Policial Aruba. Larmonie ta splica cu nan ta duna lezing y charla pero tambe consehonan priva tambe. No solamente na doñonan di negoshi pero na doñonan di cas. Por yama libremente y traha un cita, evalua con grandi e riesgonan ta na cas, con grandi un target bo ta. Hopi biaha comerciantenan ta un target mas grandi, cu e posibilidad pa tin mas placa. Nan a atraca hendenan gewoon cu no ta comerciante cu ta na cas y bay cu nan placa. Awendia bo mester sa ken bo ta confia cuanto placa bo tin. Tin cu tene cuidao cu ken bo ta tuma den bo cas. Eseynan ta circunstancianan cu ta pasando na Aruba cu bo mester ta hopi cuidadoso cun’e.
Hopi caso cu a maak mee ta inside information. Pero tin di nan cu ta crimennan di oportunidda tambe. Eynan tin cu tene cuidao cu ken bo ta comparti cierto informacionnan y ora bo ta operate, bo tin cu haci’e na un manera sigur.
No manera e sistema di antes, caminda bo ta hinca placa den un tas grandi y cana bay banco. Antes masha poco hende lo paga tino riba dje. Awendia tin hende ta cana rond y ta observa detayenan asina. Tin cu transporte na un manera mas save. Tin cu zorg pa varia e ruta, e dia e ora y forma cierto rutinanan cu hendenan ta observabo. Tin cu sinta pensa, traha un plan con bo ta bay haci’e y cu conseho di experto pa percura cu bo ta safe.