Den e luna di Juli proximo nos atleta elite den e deporte di pesas, Joel Kuiperi lo competi den e Campeonato Pan Americano cu lo tuma luga na e ciudad Miami, Florida. E dianan 20 pa27 di Juli, Joel lo competi contra e miho hisadonan di peso den e continente Americano. E competencia na Miami ta uno crucial mirando cu e ta un clasificatorio pa e Weganan Panamericano 2019 di Lima, Peru. Mester bisa cu e clasificacion aki ta prati den dos competencia den e region aki, den 2017 y 2018. Mester bisa cu aki atletanan di Aruba lo por acumula punto y lo por clasifica den e sistema di puntuacion riba e ranking final. Mas hopi punto ta nifica mas halto den ranking mas e posibilidad di clasifica ta.
Pa loke ta e atleta Joel Kuiperi esaki a sali diamars atardi pa Medellin, Colombia unda e lo permanece pa 4 siman bou di supervision y preparacion intensivo den un campo di entrenamento bou guia di e ex-entrenador nacional di Aruba, Sr. Adolfo Gallego. Bou guia di Gallego, e atleta Kuiperi lo entrena di 19 di Juni pa 19 di Juli. E plan di entrenamento di Joello ta uno mas largo cu e preparacion hiba den e luna di September 2016.
Mester bisa cu e atleta di pesas Joel Kuiperi tin apenas algun aña den e deporte pero a sa na manifesta su mes den un revalacion na Aruba mirando e recordnan Arubano cu el a kibra. Ainda Joel ta hoben y tin un bon futuro su dilanti den e deporte di pesas.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e biaha di e atleta Joel Kuiperi pa e campo di entrenamento na Medellin, Colombia.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.