Diabierna atardi, Jerehm Campbell hunto cu su famia, campañador y candidatonan di Partido MEP, a sali for di Sede di Savaneta den un parada direccion SEDE di MEP Santa Cruz. Aki, den un rueda di prensa, el a wordo lansa oficialmente como candidato riba e lista victorioso di MEP.
Famia:
Jerehm Campbell a nace y crece den e bario di Pos Chiquito. Su tata ta un meneer di scol di MTS pa hopi aña y su mama semper a disfruta di ta un ama di cas pa cuida Jerehm y su dos rumannan. Jerehm ta casa y ta tata di 6 yiu y dos nieto.
Educacion y trabou:
Jerehm tin educacion y experiencia amplio riba e tereno di salubridad publico y principalmente riba tereno di cuido mental y adiccion. E la studia enfermeria na Aruba y a termina su estudio na Hulanda den enfermeria social psychiatrico.
Despues di su estudio, el a regresa Aruba y a traha na Directie Volksgezondheidszorg y despues na Coordinatiebureau Drugsbestrijding, como hefe na Centro Dakota. Tambe Jerehm a obtene su Pedagogisch-Didactische Getuigschrift (PDG) na IPA.
Meta den politica:
E trabou cu Jerehm ta desplega diariamente aki na Aruba, a pone realisa cu tin hopi problema social y hopi hoben den adiccion cu ta bayendo den mal direccion. E nececidad pa un mehoracion den nos sistema y ta parti di e cambio pa miho a dun’e e empuhe pa e subi riba lista di Partido Movimiento Electoral di Pueblo y traha pa e pais aki riba e tereno social principalmente.
Su Vision:
Bin cu mas actividad deportivo, creativo y recreativo pa hobennan den tur distrito pa evita nan cay den maldicion of adiccion, principalmente den bario nan unda criminalidad bou nos hobentud ta halto.
Bin cu un programa di enseñansa pa hoben cu a drop out (beroepsgericht onderwijs)
Bin cu un centro/opvang pa hoben nan cu a cay den adiccion (Aruba no tin/conoce un centro di rehabilitación pa hoben nan cu un problema di adiccion).
Pa mas informacion tocante e candidato aki, sigui nos riba nos pagina di facebook MEPofficial.
Partido MEP ta yama Jerehm Campbell bon bini den nos Partido prestigioso y ta desee tur exito den e campaña electoral aki. Hunto nos ta bay pa e cambio sin miedo!