Segun Sra Arends-Reyes ta logico cu e banconan ni sector comercial no ta bay absorba e 6% di impuesto pa gobierno pues consecuentemente cu e ‘gasto’ aki lo wordo pasa di un manera of otro na e consumidor. Hopi banco a trata di promove uzo online of automatisa pa paga compranan of paga gastonan pero na momento cu pueblo of e consumidor mester paga extra gastonan nan lo purba di saca nan placa cash. E intentonan pa innovacion y miho control riba actividadnan bancario pa Aruba ta bay back atras den tempo pa motibo cu banco ta exigi basta placa di e consumidor pa nan paga nan impuesto na gobierno y e consumidor ta bai purba di keda cu mas placa posibel gana di su sodo. 6% di 2000 florin ta 120 florin minimo por ehempel cu por bai na paga transaccion fees so na un momento of otro pa yega na e placa. E circuito di cash na Aruba y cambio di dollar mas barata cu na banco por trece cune un efecto indesea y ‘cash’ ta bai manda na Aruba y ta netamente esaki ta locual a traha asina duro pa cambia cu tempo. E 9 pa 10 miyon florin cu lo kier saca extra di banconan muy probablemente ta bin di e consumidornan pues ta 9 pa 10 miyon florin cu lo no ta den circulacion di nos economia. Hopi ta esunnan cu ta remarca cu e gobierno di coalicion aki ta purbando di haci todo por todo pa tira tur culpa riba e gobierno di asignatura di AVP, pero e cifranan ta laga mustra cu tur medida nobo ta bay pa paga gastonan di e coalicion aki cu ta pasa 120 miyon florin pa e lunanan di 2018 cu nan a sinta y locual resta lo paga debe cun’e. Pueblo ta sabi y nan mes ta cuminsa ripara cu ta puro mal noticia pa nan cartera ta biniendo y ta e gobierno nobo aki mester sa maneha e barco bon pa scapa pueblo di un aumento demasiado drastico. Ni cuanto boletin y rueda di prensa pa contradeci y culpa gobierno anterior ser yama despues cu un aumento pa pueblo ser anuncia, e aumento ta keda confirma toch despues. Pensionadonan y famianan ta sumamente preocupa cu e prijsnan di tur cos lo subi pues bo ta haya menos pa bo placa. Hopi hende grandi cu ta bibando cu un pensioen chikito lo cay den pobresa pa motibo cu nan placa no ta yega y gasolin y utilidadnan tambe lo conoce un aumento. Tambe por a tuma nota cu pa motibo cu a pone presion ariba tur NV di gobierno pa duna gobierno dividendo y tambe na departamento di impuesto pa trece placa aden hopi persona, tambe esunnan di edad avansa ta hayando cobransa y menasa pisa via carta pa paga cualkier atraso cu nan tin y nan mester paga den dos dia. E tristo ta cu hopi biaha e cobransanan aki cu ‘dwangschrift’ no ta klop of a ser paga caba of tin areglo riba nan. E aumento cu e gobierno di coalicion nan a bisa cu no lo tin ningun efecto riba pueblo, a bira manera un tsunami di aumento cu tawata hopi mas cu a premira cu mester a klop cu e debenan bieu cu tawata e motibo supuestamente pa aumenta medida. Pueblo no a spera, ni haya chens tampoco pa prepara cu tur cos lo a subi asina drastico. Aruba a aumenta prijs di tur producto y servicio sin un reforma fiscal, sin un estudio di impacto ariba efectonan manera desempleo cu por bin acerca y aumento di criminalidad. Aruba ta birando un isla cu ta birando mas caro pa turista y pa e comunidad Sra Arends-Reyes ta termina bisando.